साईमत, पाळधी, ता.धरणगाव : वार्ताहर
गेल्या महिन्यात झालेल्या कापूस चोरी प्रकरणी दोन जणांना अटक केली आहे. कापूस वाहून नेण्यासाठी वापरण्यात आलेले वाहन आणि ३५ हजार रुपयांचा सात क्विंटल कापूसही ताब्यात घेण्यात आला आहे. दरम्यान, याप्रकरणी दोन जण फरार असून त्यांचा शोध घेण्यात येत आहे.
येथील सचिन शांताराम देशमुख यांच्या शेतातील पत्र्याचा शेडमध्ये साठविलेला कापूस अज्ञात चोरट्यांनी रात्री पत्र्याचा शेड कापून चोरून नेला होता. याप्रकरणी पाळधी पोलिसात गुन्हा दाखल केला होता. त्याचा तपास लागून रवींद्र सुभाष मालचे, श्रावण उर्फ योगेश निवृत्ती पानगळे (दोन्ही रा.शिरसोली) यांना ताब्यात घेतले आहे. कापूस वाहून नेण्यासाठी वापरण्यात आलेली बोलेरोही (क्र. एमएच १९ सीवाय ९९०८) ताब्यात घेऊन ३५ हजार रुपये किमतीचा सात क्विंटल कापूस जप्त केला आहे. ही कामगिरी पो. नि.उद्धव ढमाले यांच्या मार्गदर्शनाखाली स. पो. नि.सचिन शिरसाठ, अर्जुन कुवारे, विठ्ठल पाटील, विशाल पाटील यांच्या पथकाने केली.
