साईमत / अमरावती
अमरावती जिल्ह्यात धक्कादायक प्रकार समोर आला असून एका तरुणाने प्रेमाच्या बहाण्याने अनेक तरुणींना जाळ्यात ओढून त्यांचे शोषण केल्याची घटना उघडकीस आली आहे. या प्रकरणामुळे संपूर्ण परिसरात खळबळ उडाली आहे.
परतवाडा शहरातील मोहम्मद अयाज मोहम्मद तनवीर या युवकाला पोलिसांनी अटक केली आहे. आरोपीने अनेक तरुणींशी मैत्री करून त्यांचा विश्वास संपादन केला आणि नंतर त्यांना ब्लॅकमेल करत लैंगिक शोषण केल्याचा आरोप आहे. या प्रकरणात जवळपास २०० मुलींचा समावेश असल्याची प्राथमिक माहिती समोर आली आहे.
पोलिसांनी आरोपीकडून मोबाईल जप्त केला असून त्यामध्ये अनेक धक्कादायक व्हिडिओ आढळल्याची माहिती आहे. आरोपी स्वतःच हे व्हिडिओ चित्रित करत असल्याचेही तपासात निष्पन्न झाले आहे. हे व्हिडिओ फेसबुक, इन्स्टाग्राम आणि व्हॉट्सॲपसारख्या सोशल मीडियावर व्हायरल झाल्याने प्रकरण अधिक गंभीर झाले आहे.
दरम्यान, या घटनेवरून राजकीय वर्तुळातही प्रतिक्रिया उमटत आहेत. खासदार अनिल बोंडे यांनी जिल्हा पोलीस अधीक्षकांची भेट घेऊन तातडीने कारवाई करण्याची मागणी केली होती. तसेच, आरोपीला त्वरित अटक न केल्यास आंदोलनाचा इशाराही दिला होता.
यानंतर पोलिसांनी तत्काळ हालचाल करत आरोपीला अटक केली असून न्यायालयात हजर केले आहे. पुढील तपासासाठी पोलीस कोठडीची मागणी केली जाणार आहे. या प्रकरणाचा सखोल तपास सुरू असून आणखी धक्कादायक बाबी समोर येण्याची शक्यता वर्तवली जात आहे.
