साईमत / शिरूर
शिरूर बायपास परिसरात मेफेड्रोन (एमडी) विक्रीसाठी येणाऱ्या एका अल्पवयीन मुलाला स्थानिक गुन्हे शाखा आणि शिरूर पोलिसांनी सापळा रचून ताब्यात घेतले. त्याच्याकडून ६.९४ ग्रॅम वजनाचा, अंदाजे १ लाख ३८ हजार ८०० रुपयांचा मेफेड्रोन हा अमली पदार्थ जप्त करण्यात आला.
ही कारवाई शनिवारी (दि. ११) अमली पदार्थविरोधी मोहिमेदरम्यान करण्यात आली. शिरूर पोलिस ठाण्याच्या हद्दीत बंद पडलेल्या नाना स्पॉट हॉटेलजवळ एमडी विक्री होणार असल्याची गोपनीय माहिती पोलिसांना मिळाली होती. त्यानुसार सापळा रचून अल्पवयीन मुलाला ताब्यात घेण्यात आले. त्याची अंगझडती घेतली असता त्याच्याकडे अमली पदार्थ आढळून आला.
या प्रकरणी शिरूर पोलिस ठाण्यात एनडीपीएस कायद्याच्या कलम ८(क), २१(ब) तसेच बीएनएस कलम ३(५) अंतर्गत गुन्हा दाखल करण्यात आला आहे. पुढील तपास स्थानिक गुन्हे शाखा आणि शिरूर पोलिसांकडून सुरू आहे.
ही कारवाई पोलिस अधीक्षक संदीपसिंह गिल्ल, अप्पर पोलिस अधीक्षक रमेश चोपडे आणि उपविभागीय पोलिस अधिकारी प्रशांत ढोले यांच्या मार्गदर्शनाखाली करण्यात आली. यात पोलिस निरीक्षक प्रमोद क्षीरसागर, पोलिस निरीक्षक संदेश केंजळे, पोलिस उपनिरीक्षक शुभम चव्हाण तसेच पोलिस कर्मचारी तुषार पंदारे, जनार्दन शेळके, राजू मोमीन, संजू जाधव, अक्षय कळमकर आणि नीरज पिसाळ यांनी सहभाग घेतला.
