साईमत, चाळीसगाव : प्रतिनिधी
तालुक्यातील तांदुळवाडी ग्रामपंचायतीच्या नवनिर्वाचित सरपंचपदी वत्सलाबाई दादा पाटील यांचा एकमेव अर्ज आल्याने त्यांची सर्वानुमते बिनविरोध निवड करण्यात आली. ही निवडीची विशेष सभा शुक्रवारी, १४ जून रोजी दुपारी २ वाजता पार पडली. निवडीवेळी अध्यासी अधिकारी म्हणून गोंडगावच्या मंडळाधिकारी राजश्री जानराव होत्या. त्यांना ग्रामसेवक राजेंद्र सोनवणे यांचे सहकार्य लाभले. यावेळी नवनिर्वाचित सरपंच वत्सलाबाई पाटील यांच्यासह अधिकारी, पदाधिकाऱ्यांचा सत्कार करण्यात आला. ही निवड ठरल्याप्रमाणे नकुल सैंदाणे यांनी सरपंच पदाचा राजीनामा दिल्याने सरपंच पदाच्या रिक्त जागेसाठी करण्यात आली. यावेळी मावळते सरपंच नकुल सैंदाणे, उपसरपंच वंदनाबाई पाटील, सदस्या मनिषा पाटील, सीताराम पवार, अनिता मांग, शिवाजी भील आदी सदस्य उपस्थित होते. निवडीनंतर त्यांच्या सत्कारासह वृक्ष लागवडीचा कार्यक्रम घेण्यात येऊन आनंदोत्सव साजरा करण्यात आला.
याप्रसंगी मळगाव-तांदुळवाडी विकासोचे चेअरमन जयवंतराव पाटील, दादा पाटील, अर्जुन पाटील, भाऊसाहेब पाटील, बाबुराव पवार, नागो पवार, विजय पाटील, ग्रामस्थ, तलाठी करण कुलकर्णी, पो. कॉ. नरेंद्र विसपुते, पो. कॉ. दिलीप पाटील, पोलीस पाटील किरण बागुल, कोतवाल कविता सोनवणे, शितल राजपूत, राजेंद्र महाजन उपस्थित होते.
यशस्वीतेसाठी सेवक अशोक पाटील, सफाई कर्मचारी रवींद्र खैरनार, पाणी पुरवठा विभागाचे कर्मचारी राजेंद्र महाजन यांच्यासह ग्रामपंचायतीच्या कर्मचाऱ्यांनी परिश्रम घेतले. सुत्रसंचलन शरद पाटील यांनी केले.
