साईमत, भुसावळ : प्रतिनिधी
विनापरवाना गावठी बनावटीचा कट्टा आणि जिवंत काडतूस घेऊन भुसावळ शहरातील यावल नाका येथे दहशत निर्माण करणाऱ्या संशयित आरोपीला भुसावळ शहर पोलिसांनी शनिवारी, १२ ऑगस्ट रोजी रात्री साडेनऊ वाजता अटक केली. त्याच्यावर भुसावळ शहर पोलीस ठाण्यात गुन्हा दाखल केला आहे. रोहित सुनील सपकाळे (वय २१, रा. अंजाळे, ता. यावल) असे अटक केलेल्या संशयित आरोपीचे नाव आहे.
सविस्तर असे की, शहरातील यावल नाका परिसरात रोहित सपकाळे हा तरुण दुचाकीवर येऊन हातात गावठी बनावटीचा कट्ट्याचा धाक दाखवत दहशत माजवित असल्याची गोपनीय माहिती पोलीस निरीक्षक गजानन पडघन यांना मिळाली होती. त्यानुसार त्यांनी पथकाला कारवाई करण्याच्या सूचना दिल्या. शनिवारी, १२ ऑगस्ट रोजी रात्री साडेनऊ वाजता भुसावळ शहर पोलीस ठाण्याचे गुन्हे शोध पथकाने कारवाई करत संशयित आरोपी रोहित सपकाळे याला ताब्यात घेतले. त्याच्या जवळील गावठी बनावटीचा कट्टा, दोन जिवंत काडतूस आणि दुचाकी (क्र.एमएच १९ डीएफ २७९८) असा ३६ हजार रुपये किमतीचा मुद्देमाल हस्तगत केला आहे.
याप्रकरणी पोलीस कॉन्स्टेबल शैलेंद्र बनसोडे यांनी दिलेल्या फिर्यादीवरून संशयित आरोपी रोहित सुनील सपकाळे यांच्या विरोधात भुसावळ शहर पोलीस ठाण्यात गुन्हा दाखल केला आहे. तपास सहाय्यक फौजदार इकबाल इब्राहिम सय्यद करीत आहे.
