साईमत, सावदा, ता.रावेर : वार्ताहर
येथील नगर पालिकेचे मुख्याधिकारी भूषण वर्मा यांच्या मार्गदर्शनाखाली प्रथमच सावदा शहरातील महिलांनी मतदान प्रक्रियेमध्ये जास्तीत जास्त प्रमाणात सहभागी व्हावे, याकरिता आयोजित केलेल्या कार्यशाळेत शहरातील बचत गटातील महिलांचे प्रतिनिधी म्हणून बचत गटाचे अध्यक्ष आणि सचिव यांना आमंत्रित केले होते. कार्यशाळेत उपस्थित सर्व महिलांना मतदानबाबतची प्रतिज्ञा देण्यात आली.
मुख्याधिकाऱ्यांनी नगरपरिषदेतर्फे १०० टक्के मतदान हे ध्येय लक्षात ठेऊन स्पर्धेचे आयोजन केले आहे. याप्रसंगी महिलांना जास्तीत जास्त प्रमाणात मतदान करण्यासाठी त्यांनी आवाहन केले. तसेच बचत गटातील व कुटुंबातील ८५ टक्के सदस्यांनी मतदान केल्यास कास्य प्रमाणपत्र तसेच ८६ टक्के ते ९५ टक्के सदस्यांनी मतदान केल्यास त्यांना रजत प्रमाणपत्र तसेच ९६ टक्के ते १०० टक्के सदस्यांनी मतदान केल्यास त्यांना सुवर्ण प्रमाणपत्र देण्यात येईल, याबाबत मार्गदर्शन केले.
मतदान जनजागृती निमित्त शहरात, चौकाचौकात आणि मोक्याच्या ठिकाणी लावण्यात आलेले आहे. त्या माध्यमातून शहरातील मतदार आपले नाव मतदार यादीमध्ये शोधू शकतात. तसेच मतदानाचे ठिकाण याबाबतही माहिती मतदारांना मिळेल.
नगरपरिषदेमार्फत रविवारी आठवडे बाजारात मतदान कक्ष स्थापन करून त्याठिकाणी शहरातील मतदार आपली मतदानाबाबतची स्लीप घेऊ शकतात याबाबत मार्गदर्शन केले. सावदा शहरातील दिव्यांग मतदार बांधवाकरीता पालिकेतर्फे प्रत्येक मतदान केंद्रावर व्हील चेअरची सुविधा उपलब्ध करून दिलेली आहे. तसेच ८५ वर्षावरील वयोगटातील मतदारांना घरून मतदान करण्याची सुविधा उपलब्ध करून दिली जाणार आहे.
कार्यक्रमाला मुख्याधिकारी भूषण वर्मा, कार्यालय अधीक्षक सचिन चोळके, लेखापाल विशाल पाटील, सहा.प्रकल्प अधिकारी संदीप पाटील, समुदाय संघटक महेश इंगळे, शहर समन्वयक अरुणा चौधरी, संगणक तंत्रज्ञ धिरज बनसोडे, वरिष्ठ शिपाई राजेंद्र मोरे आदी उपस्थित होते.