एमआयडीसी पोलिसांची धडक कारवाई
साईमत जळगाव प्रतिनिधी
शहरातील कायदा व सुव्यवस्था अबाधित ठेवण्यासाठी पोलीस प्रशासन सतत सतर्क असतानाच, दहशत माजवण्याच्या उद्देशाने गावठी कट्टा आणि धारदार कोयता बाळगून फिरणाऱ्या दोन तरुणांना एमआयडीसी पोलिसांनी शिताफीने अटक केली. या कारवाईत पोलिसांनी दुचाकीसह एकूण ७० हजार ५०० रुपयांचा मुद्देमाल जप्त केला आहे.
मिळालेल्या माहितीनुसार, जळगाव शहरातील कासमवाडी परिसरात दोन संशयित तरुण घातक शस्त्रांसह फिरत असल्याची गोपनीय माहिती एमआयडीसी पोलीस ठाण्याचे निरीक्षक बबन आव्हाड यांना १४ एप्रिल रोजी प्राप्त झाली होती. या माहितीची तातडीने दखल घेत त्यांनी गुन्हे शोध पथकाला सापळा रचण्याचे आदेश दिले.
सापळा रचून पाठलाग
पोलिसांनी कासमवाडी ते नेरी नाका दरम्यान एकता चौकातील मोकळ्या मैदानात सापळा रचला. याच वेळी पल्सर दुचाकीवरून दोन तरुण येताना दिसले. पोलिसांनी त्यांना थांबण्याचा इशारा दिला असता, त्यांनी पळ काढण्याचा प्रयत्न केला. मात्र, सतर्क पोलिसांनी तत्काळ पाठलाग करून दोघांनाही पकडण्यात यश मिळवले.
शस्त्रांसह अटक; मुद्देमाल जप्त
तपासणीदरम्यान आरोपींकडून एक गावठी बनावटीचा कट्टा, एक धारदार लोखंडी कोयता तसेच कट्ट्याचे रिकामे मॅगझिन जप्त करण्यात आले. पोलिसांनी रोहित गोपाळ कुंवर (वय २२, रा. कासमवाडी) आणि सागर रामा सोनवणे (वय २१, रा. मेहरूण परिसर) यांना अटक केली आहे. त्यांच्या ताब्यातून सुमारे २० हजार रुपयांचा कट्टा, ५० हजार रुपयांची दुचाकी आणि इतर साहित्य असा एकूण ७० हजार ५०० रुपयांचा मुद्देमाल जप्त करण्यात आला.
दरम्यान, न्यायालयाने दोन्ही आरोपींना एक दिवसांची पोलीस कोठडी सुनावली असून, पुढील तपास एमआयडीसी पोलीस करत आहेत. शहरात गुन्हेगारी प्रवृत्तीवर लगाम घालण्यासाठी पोलिसांची ही कारवाई महत्त्वाची मानली जात आहे.
