रामानंदनगर पोलिसात गुन्हा दाखल
साईमत/जळगाव/प्रतिनिधी :
शहरातील पिंप्राळा परिसरातील सुतारवाडा भागात बंद घराला लक्ष्य करून अज्ञात चोरट्यांनी घरफोडी केल्याची गंभीर घटना उघडकीस आली आहे. सोन्याचे दागिने आणि रोख रकमेसह चोरट्यांनी ६३ हजार रुपयांचा मुद्देमाल चोरून नेला आहे. याप्रकरणी रामानंदनगर पोलीस ठाण्यात गुन्हा दाखल केला आहे. दरम्यान, घरफोडीमुळे परिसरात भीतीचे वातावरण पसरले आहे. त्यामुळे नागरिकांनी बंद घरे सोडून जाताना अधिक काळजी घ्यावी, असे आवाहन पोलिसांनी केले आहे.
पिंप्राळा येथील रहिवासी प्रमीलाबाई साहेबराव चौधरी (वय ६५) या त्यांच्या मुलीकडे सोनगीर येथे गेल्यामुळे त्यांचे घर बंद होते. ही संधी साधत अज्ञात चोरट्यांनी २८ नोव्हेंबर रोजी सायंकाळी ६ ते २९ नोव्हेंबर रोजी सकाळी ६ वाजेदरम्यान बंद घराच्या दरवाजाचे कडी-कोयंडा आणि कुलूप कापून घरात प्रवेश केला. घरात प्रवेश केल्यानंतर चोरट्यांनी कपाटे उघडून त्यातील सोन्याचे दागिने आणि ८ हजार रुपये रोख रक्कम असा ६३ हजार रुपयांचा ऐवज घेऊन पोबारा केला. प्रमीलाबाई घरी नसल्याची माहिती त्यांच्या शेजाऱ्यांना होती. सकाळी प्रमीला चौधरी यांचे घर उघडलेले दिसल्याने शेजाऱ्यांनी तातडीने घरात जाऊन पाहिले असता, घरातील सामान अस्ताव्यस्त फेकलेला आढळला. लागलीच त्यांनी प्रमीला चौधरी यांना घटनेची माहिती दिली.
या घटनेनंतर प्रमीला चौधरी यांनी दिलेल्या फिर्यादीवरून रामानंदनगर पोलीस स्टेशनमध्ये अज्ञात चोरट्यांविरुद्ध घरफोडीचा गुन्हा दाखल केला आहे. तपास पोलीस उपनिरीक्षक जितेंद्र राजपूत करत आहेत.
