अपघातातील जखमीचा उपचारादरम्यान मृत्यू
धरणगाव (प्रतिनिधी)-
तालुक्यातील पाळधी बायपासजवळ २२ एप्रिलरोजी दुपारी दोन दुचाकींची समोरासमोर धडक झाली होती. या अपघातात जखमी झालेल्या उपरसिंग करमसिंह बारेला (वय २१, रा. झिरपन, ता. वरला, मध्यप्रदेश, ह.मु. पिंप्री, ) याचा उपचारादरम्यान २५ एप्रिलरोजी सकाळी मृत्यू झाला. पोलीस पोलिसांनी अकस्मात मृत्यूची नोंद केली आहे.
उपरसिंग मजुरी करून उदरनिर्वाह करत होता. त्याच्या पश्चात आई, वडील, पत्नी आणि चार मुले असा परिवार आहे. मंगळवारी जळगावकडे दुचाकीने येत असलेले बापुराव पाटील (वय ५२) आणि त्यांची पत्नी संगीता पाटील (वय ४५, दोघे रा. पिंप्राळा, जळगाव) हे देखील जखमी झाले होते.
पाळधीहून धरणगावकडे जाणाऱ्या उपरसिंगच्या दुचाकीची समोरून येणाऱ्या बापुराव पाटील यांच्या दुचाकीला धडक लागली होती. या अपघातात मगन बारेला (वय २५) हादेखील जखमी झाला होता.
जखमी उपरसिंगला जळगावच्या खाजगी रुग्णालयात दाखल करण्यात आले होते. तीन दिवस अतिदक्षता विभागात उपचार सुरू असतानाही तो वाचला नाही.
