धरणगावात पोलिसात दाखल गुन्ह्यात आता खुनाचे कलम वाढणार
जळगाव/धरणगाव :
शेअर मार्केटमधील गुंतवणुकीसाठी घेतलेल्या कर्जावरून झालेल्या वादातून नातवाने आजीच्या डोक्यात कुऱ्हाडीने वार करून तिला गंभीर जखमी केल्याची धरणगावातील घटना आता खुनात बदलली आहे. या हल्ल्यात गंभीर जखमी झालेल्या लिलाबाई रघुनाथ विसपुते (वय ७०, रा. महाबळ) यांच्यावर पुणे येथे उपचार सुरू असताना त्यांचा मंगळवारी, ८ जुलै रोजी दुपारी ३ वाजता मृत्यू झाला. त्यामुळे याप्रकरणी धरणगाव पोलीस ठाण्यात दाखल गुन्ह्यात आता खुनाचे कलम वाढविण्यात येणार असल्याची माहिती पोलिसांनी दिली. दरम्यान, या घटनेमुळे धरणगाव परिसरात खळबळ उडाली आहे.
सविस्तर असे की, शेअर मार्केटमध्ये मोठ्या प्रमाणावर कर्ज घेतल्याने लिलाबाई विसपुते यांनी नातू तेजस विलास पोतदार (रा. धरणगाव) याला रागावले होते. त्यावरून त्यांच्यात अनेकवेळा वाद झाले होते. गेल्या २६ जून रोजी दुपारी सव्वा तीन वाजेच्या सुमारास तेजस आणि लिलाबाई यांच्यात शेअर मार्केटच्या कर्जावरून पुन्हा एकदा जोरदार वाद झाला. त्याच वादातून तेजसने बेडरूममध्ये झोपलेल्या त्याची आजी लिलाबाई यांच्या डोक्यात कुऱ्हाडीने वार करून त्यांना गंभीर जखमी केले होते.
नातू सध्या न्यायालयीन कोठडीत
तेजसने आजीवर वार केल्यानंतर कोणीतरी हल्ला केल्याचा बनाव रचण्याचा प्रयत्न केला होता. मात्र, पोलिसांनी घटनेचा सखोल तपास करून तेजसनेच हल्ला केल्याचे उघड केले होते. त्यावेळी त्याला अटक केली होती. त्याला सध्या न्यायालयीन कोठडीत ठेवले आहे. रक्ताच्या थारोळ्यात पडलेल्या लिलाबाईंची प्रकृती चिंताजनक असल्याने त्यांना तातडीने पुणे येथे हलविण्यात आले होते. तेथे उपचार सुरू असताना त्यांचा ८ जुलै रोजी दुपारच्या सुमारास त्यांचा मृत्यू झाल्याचे सांगण्यात आले.
