एलसीबीचे पोलीस निरीक्षक सुदैवाने बचावले ; एक ताब्यात, तिघे फरार
साईमत/जळगाव/प्रतिनिधी :
जिल्ह्यात गोवंश तस्करीच्या घटनांमध्ये वाढ झालेली आहे. अशा घटनांना आळा बसावा, यासाठी पोलीस प्रशासनातर्फे वेळोवेळी कारवाई करण्यात येत आहे. अशातच रविवारी, १५ जून रोजी स्थानिक गुन्हे शाखेचे (एलसीबी) वरिष्ठ पोलीस निरीक्षक संदीप पाटील यांनी गोवंश तस्करी करणाऱ्या इनोव्हा वाहनाचा मुक्ताईनगरजवळून पाठलाग सुरु केला. त्यांना हे वाहन अकोला जिल्ह्यात पकडण्यात यश आले. परंतु, वाहनातील तस्करांनी पोलिसांवर हल्ला चढविला. तस्करांनी पोलीस निरीक्षक संदीप पाटील यांना वाहनाने चिरडण्याचाही प्रयत्न केला. त्यात ते गंभीर जखमी झाले आहे. सध्या त्यांच्यावर उपचार सुरु असल्याचे सांगण्यात आले.
एलसीबीचे पोलीस निरीक्षक संदीप पाटील, उपनिरीक्षक अनिल जाधव आणि पोलीस चालक दर्शन ढाकणे हे रविवारी रात्री जिल्ह्याभर गस्तीवर होते. पोलिसांनी गोवंश तस्करी करत असलेल्या संशयावरुन गाडीचा मुक्ताईनगरपासून मलकापूर, नांदुरा, बाळापूरमार्गे पथकाने तब्बल १०० कि.मी.पेक्षा अधिक अंतराचा पाठलाग सुरु केला. पोलिसांनी अकोलाजवळ संबंधित इनोव्हा वाहनाला ओव्हरटेक करून थांबवले. त्यावेळी संदीप पाटील यांनी गाडीचा दरवाजा उघडण्याचा प्रयत्न केला. मात्र, तस्कराने इनोव्हा रिव्हर्स घेत त्यांना चिरडण्याचा प्रयत्न केला. त्यात त्यांच्या छातीला आणि बरगड्यांना दुखापत झाली आहे. पाय आणि चेहरा खरचटला आहे. मात्र, त्यांनी प्रसंगावधान राखत स्वतःचा बचाव केला.
तिघांनी पोलिसांना दिला चकवा
एवढ्यावरच न थांबता संदीप पाटील यांनी हार न मानता वाहनासह एकास ताब्यात घेतले. मात्र, वाहनातील इतर तिघे आरोपी अंधाराचा फायदा घेत फरार झाले आहेत. त्यानंतर त्यांनी तात्काळ जिल्हा नियंत्रण कक्षास तसेच खामगाव व अकोला पोलिसांना माहिती दिली. ही माहिती मिळताच अकोला पोलिसांनी त्वरित नाकाबंदी लागू केली. मात्र, आरोपींनी जंगल किंवा ग्रामीण भागात पळून जाऊन पोलिसांना चकवा दिला. घटनास्थळी अकोला पोलिसांनी पंचनामा केला आहे. गुन्हा दाखल करण्याचे काम उशीरापर्यंत सुरु होते. दरम्यान, गोवंश तस्करी करणारे आता पोलिसांवरही हल्ले करत असल्याचे या घटनेतून स्पष्ट झाले आहे. त्यामुळे अशा तस्करांवर कठोर कारवाईसाठी विशेष मोहीम राबविण्याची गरज निर्माण झाली आहे.
