अभ्यासिकेत विद्यार्थ्यांसाठी आयोजित मार्गदर्शन कार्यक्रमात जि.प.च्या सीईओ मिनल करनवाल यांचे प्रतिपादन
साईमत/जळगाव/प्रतिनिधी :
स्पर्धा परीक्षेत यशस्वी होण्यासाठी आत्मविश्वासासोबत शिस्त, सातत्य आणि प्रामाणिकपणा ठेवावा, असे प्रतिपादन जिल्हा परिषदेच्या मुख्य कार्यकारी अधिकारी मिनल करनवाल यांनी केले. त्या शुक्रवारी, १३ जून शहरातील जी.एस. मैदानाजवळील विद्यानिकेतन शाळेत सुरु केलेल्या अभ्यासिकेत आयोजित मार्गदर्शन कार्यक्रमात बोलत होत्या. यावेळी स्पर्धा परीक्षांची तयारी करणाऱ्या विद्यार्थ्यांशी संवाद साधताना त्यांनी उपयुक्त मार्गदर्शन केले.
यशस्वी उमेदवारांचे व्हिडीओ बघून अभ्यासाची पद्धत ठरवू नका. स्वतःच्या क्षमतेनुसार योग्य पद्धतीने अभ्यास करा. यशासाठी कोणताही शॉर्टकट नसतो. मेहनत हीच यशाची गुरुकिल्ली आहे, असे त्यांनी स्पष्ट सांगितले. प्रत्येक परीक्षेसाठी एक निश्चित अभ्यासक्रम असतो. तो डोळ्यासमोर ठेवून मागील वर्षांचे प्रश्नपत्रिका सोडवा, सराव करा. सातत्याने सराव केल्यास आत्मविश्वास वाढतो आणि परीक्षेच्या वेळी मन:स्थिती स्थिर राहते. परीक्षेला जाताना योग्य मानसिकता अत्यंत महत्त्वाची असल्याचेही त्यांनी सांगितले.
विद्यार्थ्यांसाठी प्रेरणादायी अन् मनोबल वाढविणारे ठरले मार्गदर्शन
विद्यार्थ्यांना आत्मपरीक्षणाचे आणि स्वतःशी प्रामाणिक राहण्याचे आवाहन सीईओ करनवाल यांनी केले. मनात भीती असावी, पण त्या मेहनतीत अडथळा ठरू नये. यश-अपयशासाठी इतरांना दोष देण्याऐवजी आपली जबाबदारी स्वतः स्वीकारा. प्रत्येक व्यक्तीत यशस्वी होण्याची क्षमता असते, ती ओळखून योग्य दिशा आणि प्रयत्न आवश्यक असतात, असेही त्या म्हणाल्या. त्यांनी ७ मुद्यांच्या आधारे स्पर्धा परीक्षेतील यशाचा प्रवास उलगडून दाखविला. करनवाल यांचे मार्गदर्शन विद्यार्थ्यांसाठी प्रेरणादायी आणि मनोबल वाढविणारे ठरले. कार्यक्रमास विद्यार्थ्यांसह पालक उपस्थित होते. यावेळी विद्यार्थ्यांनी त्यांच्या अडचणी सांगत मार्गदर्शन घेतले.
