वाहन चालक फरार, उमाळा गावात पसरली शोककळा
साईमत/जळगाव/प्रतिनिधी :
तालुक्यातील उमाळा येथील रहिवासी शरद समाधान पाटील (वय अंदाजे ३५) यांचा शेतातून दुचाकीवरून (क्र.एमएच १९ एबी३९१२) घरी परत येत असताना बुधवारी, ११ जून रोजी सायंकाळी ७ वाजता अज्ञात वाहनाच्या धडकेत मृत्यू झाला. भरधाव वेगातील अज्ञात वाहनाने जोरदार धडक दिल्यानंतर वाहन चालक घटनास्थळावरून फरार झाला. घटनेनंतर गावातील पोलीस पाटील रंगनाथ बिऱ्हाडे, राहुल बिऱ्हाडे यांनी प्रसंगावधान राखून शरद पाटील यांना स्वतःच्या वाहनातून जळगाव सिव्हिल रुग्णालयात दाखल केले. मात्र, डॉक्टरांनी तपासणीनंतर त्यांना मृत घोषित केले. या घटनेमुळे उमाळा गावात शोककळा पसरली आहे. दरम्यान, शरद पाटील यांच्या निधनामुळे गावाने एक प्रामाणिक आणि मेहनती युवक गमावला असल्याची भावना ग्रामस्थांमधून व्यक्त होत आहे.
अपघाताची माहिती मिळताच माजी सरपंच योगेश खडसे आणि उमाळा विकास सेवा संस्थेचे चेअरमन अनिल खडसे यांनी तात्काळ सिव्हिल हॉस्पिटल गाठले. त्यांनी पाटील कुटुंबियांची भेट घेऊन सांत्वन करुन सर्वतोपरी मदतीचे आश्वासन दिले. ही घटना जळगाव एमआयडीसी पोलीस स्टेशनच्या हद्दीत घडली आहे. दरम्यान, पोलीस अज्ञात वाहनासह चालकाचा शोध घेत आहेत.
