बांधकाम, घरेलू कामगारांतर्फे जोरदार निदर्शने, घोषणाबाजीने परिसर दणाणला
साईमत/जळगाव/प्रतिनिधी :
जिल्ह्यातील बांधकाम कामगार आणि घरेलू कामगारांच्या विविध मागण्यांसाठी तसेच कल्याणकारी मंडळाच्या योजनांचा लाभ मिळावा अशा प्रमुख मागणीसाठी मंगळवारी, २० मे रोजी दुपारी १२ वाजता आंबेडकर मार्केट परिसरातील सहाय्यक कामगार आयुक्त कार्यालयासमोर जळगाव जिल्हा बांधकाम कामगार संघटना आणि घरेलू कामगार संघटना यांच्यावतीने जोरदार निदर्शने करण्यात आली. दरम्यान, आंदोलनकर्त्यांनी दिलेल्या मोठ्या घोषणाबाजीने परिसर दणाणून सोडला होता.
निदर्शनांमध्ये कामगारांनी अनेक महत्त्वाच्या मागण्या केल्या आहेत. त्यापैकी प्रमुख मागणी होती की, बोगस आणि अपात्र कामगारांची नोंदणी तात्काळ थांबवावी. यासोबतच खऱ्या आणि पात्र बांधकाम कामगारांची कल्याणकारी मंडळाने तातडीने नोंदणी करावी, अशी जोरदार मागणी करण्यात आली. पात्र कामगारांना गृहोपयोगी भांडे आणि इतर आवश्यक लाभ त्वरित मिळावेत, अशा प्रमुख मागण्यांसाठी कामगारांनी आवाज उठविला. हे आंदोलन पाच मागण्यांसाठी करण्यात आले.
खरे कामगार लाभांपासून वंचित
आंदोलनात जिल्हा बांधकाम संघटनेचे विजय पवार, अनिकेत ताराबाई महाजन आणि प्रवीण चौधरी यांच्यासह बांधकाम कामगार, घरेलू कामगार उपस्थित होते. कामगारांनी आपल्या हक्कांसाठी एकजुटीने घोषणाबाजी करत प्रशासनाचे लक्ष वेधून घेतले. बोगस नोंदणीमुळे खऱ्या कामगारांना मिळणाऱ्या लाभांपासून वंचित रहावे लागत असल्याचा आरोप करण्यात आला.
आंदोलनकर्त्यांकडून तीव्र आंदोलनाचा इशारा
निदर्शनांमुळे सहाय्यक कामगार आयुक्त कार्यालयाबाहेर काही काळ तणावाची परिस्थिती निर्माण झाली होती. मात्र, पोलिसांनी योग्य बंदोबस्त ठेवल्याने कोणताही अनुचित प्रकार घडला नाही. कामगार संघटनांनी प्रशासनाने मागण्यांची गांभीर्याने दखल घेऊन तातडीने कार्यवाही करावी, अशी मागणी केली आहे. अन्यथा, यापुढे तीव्र आंदोलन करण्याचा इशाराही आंदोलनकर्त्यांनी दिला आहे.
