साईमत जळगाव प्रतिनिधी
जळगाव जिल्ह्यात लाचखोरीच्या एका मोठ्या प्रकरणाचा पर्दाफाश झाला आहे. या प्रकरणात अन्न व औषधे प्रशासन कार्यालयातील औषध निरीक्षक किशोर देशमुख यांनी पशूपक्षी फार्मा दुकानाचा परवाना मिळवण्यासाठी ८ हजार रुपयांची लाच मागितली होती. या प्रकरणी लाचलुचपत प्रतिबंधक विभागाने (एसीबी) सापळा रचून औषध निरीक्षक देशमुख आणि त्यांच्या पंटरला रंगेहात पकडले आहे.
शिरपूर येथील एका व्यापारी संकुलातील गाळ्यात तक्रारदाराने पशूपक्षी फार्माचे दुकान सुरू करायचे होते. त्यासाठी त्यांनी आवश्यक कागदपत्रांसह ऑनलाईन अर्ज दाखल केला होता. औषध निरीक्षक किशोर देशमुख यांनी तक्रारदाराला सांगितले की ते शिरपूर येथील मेडिकल दुकानदार तुषार जैन यांच्यासह स्थळ पाहणी करणार आहेत आणि त्यासाठी ८ हजार रुपये द्यावे लागतील. या लाच मागणीमुळे तक्रारदाराने धुळे येथील एसीबीच्या कार्यालयात तक्रार दाखल केली.
एसीबीच्या पथकाने पारोळा चौफुलीवर सापळा रचला आणि तुषार जैनला रंगेहात पकडले. त्यानंतर औषध निरीक्षक किशोर देशमुख यांना ताब्यात घेण्यात आले. या प्रकरणी आझादनगर पोलीस ठाण्यात दोघांविरुद्ध भ्रष्टाचार प्रतिबंध अधिनियम १९८८ च्या कलम ७ अ आणि १२ अन्वये गुन्हा दाखल करण्यात आला आहे. ही कारवाई एसीबीच्या पोलीस उपअधीक्षक सचिन साळुंखे आणि त्यांच्या पथकाने केली आहे.
