जावळे यांच्या कार्यकुशलतेचे केले विशेष कौतुक
साईमत/रावेर/प्रतिनिधी
रावेर मतदारसंघाचे नवनिर्वाचित युवा आमदार अमोल जावळे यांचा भाजपचे नेते तथा उपमुख्यमंत्री देवेंद्र फडणवीस यांनी शाल, श्रीफळ देऊन सत्कार केला. रावेर मतदारसंघात काँग्रेसचा ४३ हजार ५६२ मतांनी पराभव करत मोठ्या फरकाने विजय मिळविल्याबद्दल फडणवीस यांनी जावळे यांचे कौतुक केले. २०१९ च्या निवडणुकीत रावेर मतदारसंघ काँग्रेसकडे होता. मात्र, २०२४ च्या निवडणुकीत अमोल जावळे यांनी काँग्रेसचे उमेदवार धनंजय चौधरी यांचा मोठ्या मताधिक्याने पराभव केला. जावळे यांना एक लाख १३ हजार ६७६ मते मिळाली.
यावेळी फडणवीस यांनी रावेर मतदारसंघाच्या विजयाला अभिमानाचा अध्याय संबोधले आणि जावळे यांच्या कार्यकुशलतेचे विशेष कौतुक केले. याप्रसंगी राज्याचे मंत्री गिरीषभाऊ महाजन, चाळीसगावचे आमदार मंगेशदादा चव्हाण तसेच भाजपचे इतर पदाधिकारी उपस्थित होते. त्यानंतर जावळे यांनी महाराष्ट्राच्या विकासाला समर्पित असलेल्या “महाराष्ट्र इन्स्टिट्यूशन फॉर ट्रान्सफॉर्मेशन” (MITRA) संस्थेचे सीईओ प्रवीण परदेशी (माजी सनदी अधिकारी) यांची भेट घेतली.
रावेर विधानसभा क्षेत्रातील समस्या आणि त्यावरील उपायांवर भेटीत सखोल चर्चा झाली. क्षेत्राच्या सर्वांगिण विकासासाठी प्रभावी योजना आखण्याचा निर्धार केला. आ.अमोल जावळे यांनी रावेर मतदारसंघाच्या प्रगतीसाठी सर्वतोपरी योगदान देण्याचा निश्चय व्यक्त केला. स्थानिक जनतेच्या विश्वासाला पात्र ठरण्याची ग्वाही दिली.
