भ्रष्टाचारी कॉन्ट्रॅक्टर, अधिकाऱ्यांसह मंत्र्यांवर कठोर कारवाईची मागणी
साईमत/चोपडा/प्रतिनिधी :
सिंधुदुर्ग जिल्ह्यातील मालवण येथील राजकोट किल्ल्यावरील शिवस्मारक अवघ्या आठ महिन्यात कोसळल्याने आम आदमी पार्टी चोपडा शाखेतर्फे घटनेचा जाहीर निषेध व्यक्त केला आहे. विद्यमान सरकारने फक्त प्रसिद्धीसाठी देशातील कोट्यावधी शिवप्रेमींच्या भावना दुखावल्या आहेत. त्यामुळे चोपडा तालुका आम आदमी पार्टीतर्फे घटनेचा जाहीर निषेध करण्यात आला. तसेच दुर्दैवी घटनेला जबाबदार भ्रष्टाचारी कॉन्ट्रॅक्टर, अधिकारी व मंत्र्यांवर कठोर कारवाई व्हावी, अशी मागणी करण्यात आली.
भारतीय नौदल दिनाचे औचित्य साधून गेल्या ४ डिसेंबर २०२३ रोजी मालवणनजीक राजकोट किल्ल्यावर छत्रपती शिवाजी महाराजांचा पूर्णाकृती पुतळा बसविण्यात आला होता. तो पुतळा अवघ्या आठ महिन्यात म्हणजे २६ ऑगस्ट २०२४ रोजी पुतळा कोसळल्याची दुर्दैवी घटना घडली आहे. पुतळा बसविण्यापूर्वी शिवप्रेमींनी आवाज उठवून पुतळा आकारहीन व शिल्पशास्त्रास धरून नसल्याचे कळवले होते. परंतु सूचनांकडे दुर्लक्ष करून शिवस्मारकाचे घाईघाईने पंतप्रधान नरेंद्र मोदी यांच्या हस्ते उद्घाटन करण्यात आले. शिव स्मारकासाठी महाराष्ट्रातील जनतेचे अडीच कोटी रुपये खर्चुन जयदीप आपटे या अल्पअनुभवी कारागिराला काम दिले गेले होते.
यांची होती उपस्थिती
यावेळी जिल्हा महासचिव विठ्ठलराव साळुंखे, तालुकाध्यक्ष समाधान बाविस्कर, युवा नेते बाबु कोळी, तालुका सचिव भीमराव उमाळे, अशोक ढालवाले, बळीराम बारेला, मयाराम बोरेला, सुनील रमेश बोरला, छोटू सोनवणे, विजय शेलकर यांच्यासह पदाधिकारी, कार्यकर्ते उपस्थित होते.
