साईमत, चोपडा : प्रतिनिधी
येथे इयत्ता पहिली, चवथी आणि सातवीच्या विद्यार्थांसाठी घेण्यात आलेल्या चोपडा टॅलेंट हंट स्पर्धा परीक्षेचा पारितोषिक सोहळा रविवारी उत्साहात पार पडला. तब्बल १ हजार ३२४ विद्यार्थ्यांनी सहभाग नोंदविलेल्या परीक्षेतील १५० यशस्वी विद्यार्थ्यांना पारितोषिक मिळाले. तसेच उर्वरित सर्व सहभागी विद्यार्थ्यांना प्रमाणपत्र देण्यात आले. याप्रसंगी व्यासपीठावर प्रमुख पाहुणे म्हणून पंकज शैक्षणिक व सामाजिक संस्थेचे संचालक पंकज बोरोले, कवी विलास पाटील, पवन लाठी, महात्मा गांधी विद्यालयाचे मुख्याध्यापक एन. एस. सोनवणे, पी.व्ही.एम.इंग्लिश मीडियम स्कुलचे प्राचार्य रजिश, पत्रकार संदीप ओली आदी उपस्थित होते.
चोपडा तालुक्यातील स्टेट बोर्ड तसेच सीबीएसई माध्यमाच्या सर्व शाळांमधील विद्यार्थ्यांनी परीक्षेत सहभाग नोंदविला. चोपडा टॅलेंट हंट आयोजन समितीमार्फत परीक्षेसाठी मोठी आकर्षक बक्षिसे विद्यार्थ्यांसाठी ठेवण्यात आली होती. विद्यार्थ्यांना परीक्षेकडे आकर्षित करणे तसेच स्पर्धेच्या युगात त्यांना स्पर्धा परीक्षांसाठी सज्ज करणे हा यामागील उद्देश होता. शहरातील आणि तालुक्यातील विविध शाळांमधील १ हजार ३२४ विद्यार्थ्यांनी परीक्षेत सहभाग नोंदविला होता. त्यामध्ये १५० विद्यार्थ्यांना आकर्षक बक्षीसे म्हणून सायकल, स्मार्ट वॉच, स्टडी टेबल, रायटिंग पॅड, स्कुल बॅग, ड्रॉइंग किट असे देण्यात आली.
यशस्वीतेसाठी आयडियल इंग्लिश अकॅडमीचे संचालक पद्माकर पाटील, गुरु क्लासेसचे संचालक अश्विनी कुमार चौधरी, समर्थ मॅथ्स अँड सायन्स अकॅडमीचे संचालक घनश्याम पाटील, विशाल मराठे यांनी परिश्रम घेतले. परीक्षेच्या नियोजनबद्ध आयोजनासाठी अनेक विद्यार्थ्यांनी स्वयंसेवक म्हणून परिश्रम घेतले. तसेच आयोजनात सक्रिय सहभाग घेतला.
