साईमत, धरणगाव : प्रतिनिधी
येथील इंदिरा गांधी माध्यमिक विद्यालय व कनिष्ठ महाविद्यालय तसेच आय.सी.टी.सी.विभाग ग्रामीण रुग्णालय, धरणगाव यांच्या संयुक्त विद्यमाने नुकताच आंतरराष्ट्रीय युवा दिना साजरा करण्यात आला. हा कार्यक्रम वैद्यकीय अधिकारी डॉ. प्रवीण पाटील यांच्या मार्गदर्शनाखाली घेण्यात आला. अध्यक्षस्थानी मुख्याध्यापिका श्रीमती एस.एस.पाटील होत्या. यावेळी पर्यवेक्षक ए. एस. पाटील, डॉ. मयूर जैन (दंतचिकित्सक ग्रामीण रुग्णालय, धरणगाव), आयसीटीसी विभागाचे समुपदेशक ज्ञानेश्वर शिंपी, राजेश्वर काकडे, गणेश कुंभार, आरोग्य सेवक आर.के.देशमुख, श्री. सैंदाणे उपस्थित होते.
कार्यक्रमात आर.के. एस.के. समुपदेशक गणेश कुंभार यांनी युवकांच्या जबाबदाऱ्या याविषयी मार्गदर्शन केले. तसेच एचआयव्ही एड्स व गुप्त रोग या संवेदनशील विषयासंबंधी युवकांमध्ये जनजागृती व्हावी, याकरीता रांगोळी स्पर्धेचे आयोजन केले होते. त्याला अनुसरून समुपदेशक शिंपी यांनी एचआयव्ही एड्स व गुप्त रोग यासंदर्भात सविस्तर माहिती देऊन मार्गदर्शन केले. डॉ. मयूर जैन यांनी तंबाखू प्रतिबंधक कार्यक्रमांतर्गत युवकांना माहिती देऊन मार्गदर्शन केले. तसेच महाविद्यालयाच्यावतीने ए. एस. पाटील यांनी मनोगत व्यक्त केले.
एचआयव्हीविषयी पोस्टर प्रदर्शनाद्वारे जनजागृती
तरुणांसाठी हरितक्रांती जगाच्या स्वस्त विकासासाठी हरितक्रांती तरुणांची माहिती पीपीटीद्वारे सादरीकरण करण्यात आले. यानंतर रांगोळी स्पर्धेचा निकाल जाहीर करण्यात आला. पोस्टर प्रदर्शनाद्वारे एचआयव्ही जनजागृती करण्यात आली. तसेच युवक युवतींना आंतरराष्ट्रीय युवा दिनानिमित्त शपथ देण्यात आली. यशस्वीतेसाठी ज्युनियर कॉलेज विभागाच्या सर्व शिक्षकांसह विद्यार्थ्यांनी परिश्रम घेतले. प्रास्ताविक प्रा.पी.पी.पाटील तर आभार प्रा. ए.एस. सूर्यवंशी यांनी मानले.
