भुसावळ शहर पोलिसात दोघांवर गुन्हा दाखल
साईमत/भुसावळ/प्रतिनिधी
शहरातील तापी नगरात राहणाऱ्या एका ६५वर्षीय वृद्धाला बँकेचे व्यवहार घरपोहच करून देऊन चांगले रिटर्न मिळवून देण्याचे आमिष दाखवत तब्बल १९ लाख ४०५ रुपयांची फसवणूक केल्याची धक्कादायक घटना उघडकीला आली आहे. याप्रकरणी भुसावळ शहर पोलीस ठाण्यात दोन जणांविरोधात गुन्हा दाखल केला आहे.
प्रदीपसिंह प्रतापसिंह परदेशी (वय६५, रा. तापी नगर, भुसावळ) हे वृद्ध आपल्या परिवारासह वास्तव्याला आहे. ते सेवानिवृत्त आहेत. १० मार्च २०२३ ते ६ डिसेंबर २०२३ च्या दरम्यानच्या काळात जळगाव येथे राहणारे संदीप चौधरी आणि सोनाली चौधरी यांनी प्रदीपसिंह परदेशी यांना बँकेचे व्यवहार घरपोहच करून देऊन चांगले रिटर्न मिळवून देऊ, असे सांगून विश्वास संपादन करून त्यांच्याकडून कॅश, ऑनलाईन व चेकद्वारे तब्बल १९ लाख ४०५ रुपये स्वीकारून त्याच्या मोबदल्यात बनावट व हुबेहूब दिसणारे कागदपत्र तयार करून त्यांच्या घरी आणून अपहार केला.
दरम्यान, आपली फसवणूक झाल्याचे लक्षात आल्यानंतर प्रदीपसिंह परदेशी यांनी २५ नोव्हेंबर रोजी दुपारी भुसावळ शहर पोलीस ठाण्यात धाव घेऊन तक्रार दिली. त्यानुसार संशयित आरोपी संदीप चौधरी,सोनाली चौधरी यांच्या विरोधात गुन्हा दाखल केला आहे. पुढील तपास पीएसआय विजय गायकवाड करीत आहे.
