साईमत न्यूज नेटवर्क –
अमरावती : समृद्धी महामार्गावर धामणगाव रेल्वे तालुक्यातील टोलनाक्याजवळ कार आणि ट्रक यांच्यात झालेल्या भीषण अपघातात एकाच कुटुंबातील पाच जणांचा जागीच मृत्यू झाल्याची अत्यंत धक्कादायक घटना समोर आली आहे. मृतांमध्ये दोन पुरुष, दोन महिला आणि एका लहान मुलीचा समावेश असून हे सर्व चंद्रपूर जिल्ह्यातील रहिवासी असल्याची प्राथमिक माहिती आहे.
मिळालेल्या माहितीनुसार, वॅगनआर कार (WagonR) चंद्रपूरहून मुंबईच्या दिशेने प्रवास करत होती. समृद्धी महामार्गावरील चॅनल क्रमांक १०५ जवळ या कारने पुढे चालणाऱ्या ट्रकला मागून जोरदार धडक दिली. धडकेचा जोर इतका भीषण होता की कारचा अक्षरशः चक्काचूर झाला आणि कारमधील पाचही जणांचा जागीच मृत्यू झाला.
या अपघातानंतर महामार्गावर काही काळ वाहतूक कोंडी निर्माण झाली होती. घटनेची माहिती मिळताच स्थानिक पोलीस आणि समृद्धी महामार्गावरील बचाव पथक तातडीने घटनास्थळी दाखल झाले. मृतदेह कारमधून बाहेर काढून पुढील कार्यवाहीसाठी रुग्णालयात पाठविण्यात येत आहेत.
दरम्यान, या घटनेचा पुढील तपास पोलीस करत असून अपघाताचे नेमके कारण शोधण्याचे प्रयत्न सुरू आहेत.
