साईमत / उत्तर प्रदेशा
उत्तर प्रदेशातील बस्ती जिल्ह्यातील छावनी पोलीस ठाण्याच्या हद्दीत एक अत्यंत धक्कादायक आणि संतापजनक घटना घडली आहे. मलौली गोसाई गावात एका लग्नसमारंभादरम्यान केटरिंग कामगार आचाऱ्याने रागाच्या भरात 11 वर्षीय मुलाला पेटत्या तंदूरमध्ये फेकल्याची घटना समोर आली आहे. या घटनेत मुलगा गंभीर जखमी झाला असून त्याच्यावर लखनऊ मेडिकल कॉलेजमध्ये उपचार सुरू आहेत.
मिळालेल्या माहितीनुसार, चमन (वय 11) हा आपल्या आजीसोबत नातेवाईकाच्या लग्नाला गेला होता. लग्नात खेळत असताना तो जेवणाच्या ठिकाणी गेला आणि तिथे ठेवलेले रसगुल्ले खाऊ लागला. याच कारणावरून केटरिंग काम करणारा आचारी संतापला.
आरोपीने संतापाच्या भरात मुलाला पकडून थेट पेटत्या तंदूरजवळ नेले आणि त्याला तंदूरमध्ये फेकल्याचे सांगितले जात आहे. या घटनेनंतर लग्नसमारंभात एकच गोंधळ उडाला. उपस्थितांनी तात्काळ मुलाला बाहेर काढून रुग्णालयात दाखल केले.
प्राथमिक उपचार अयोध्या मेडिकल कॉलेजमध्ये केल्यानंतर डॉक्टरांनी त्याची प्रकृती गंभीर असल्याने त्याला लखनऊ मेडिकल कॉलेजमध्ये हलवण्याचा सल्ला दिला. सध्या मुलगा चेहऱ्यापासून कंबरेपर्यंत गंभीर भाजल्याने मृत्यूशी झुंज देत आहे.
घटनेनंतर आरोपी आचारी घटनास्थळावरून फरार झाला आहे. या प्रकरणी पीडित मुलाच्या नातेवाईकांनी छावनी पोलीस ठाण्यात तक्रार दाखल केली असून पोलिसांनी अज्ञात व्यक्तीविरुद्ध गुन्हा नोंदवला आहे. आरोपीचा शोध सुरू असल्याची माहिती पोलिसांनी दिली आहे.
