दुकानदाराचीच उतरविली ! ; १० लाखांच्या दारूसह ७० हजार लंपास
जळगाव (प्रतिनिधी)-
शहरातील इच्छादेवी चौकात २३ एप्रिलरोजी पहाटे मद्य विक्रीच्या दुकानावर चोरांनी डल्ला मारला अज्ञात चोरट्यांनी अशोका लिकर गॅलरी या दुकानाचे शटर तोडून गल्ल्यातील ७० हजार रुपयांसह १० लाख रुपये किंमतीच्या देशी आणि विदेशी दारूचे १२६ बॉक्स चोरून नेले.
भुसावळचे अशोकशेठ नागराणी यांचे इच्छादेवी चौफुली परिसरात महामार्गालगत अशोका लिकर गॅलरी दुकान आहे. बुधवारी पहाटे चोरट्यांनी दुकानाचे शटर उचकवून काउंटरमधील ७० हजार रुपयांची रोकड आणि विविध प्रकारच्या महागड्या दारूचे बॉक्स लंपास केले. चोरट्यांनी कोणताही पुरावा मागे राहू नये म्हणून दुकानातील सीसीटीव्ही कॅमेरे आणि डिजिटल व्हिडिओ रेकॉर्डर (डीव्हीआर) देखील चोरून नेला.
उपविभागीय पोलीस अधिकारी संदीप गावीत यांच्यासह जिल्हापेठ पोलीस ठाणे आणि स्थानिक गुन्हे शाखेच्या पथकाने घटनास्थळी धाव घेतली. पोलिसांनी परिसराची पाहणी करीत फॉरेन्सिक तज्ज्ञांच्या टीमने घटनास्थळावरून ठसे आणि इतर पुरावे गोळा केले आहेत. शहराच्या मध्यभागी आणि नेहमी वर्दळ असलेल्या ठिकाणी एवढी मोठी चोरी झाल्याने पोलीसांसमोर आव्हान उभे राहिले आहे.
