साईमत, लोहारा, ता.पाचोरा : वार्ताहर
येथील श्री रामकृष्ण हरी मंदिर येथे ‘माणुसकी समुहा’तर्फे शेंदुर्णीतील गीते डेंटल मल्टीस्पेशलिटी हॉस्पिटलचे संचालक डॉ. महेंद्र गीते यांच्या वाढदिवसानिमित्त ३१ झाडांचे वृक्षारोपण नुकतेच करण्यात आले. गावातील श्रीरामकृष्ण हरी मंदिरात झाडांचे वृक्षारोपण करून त्यांनी एक वेगळा आदर्श समाजासमोर ठेवला आहे. दरवर्षी वाढदिवसाला वृक्षारोपण करून वाढदिवस साजरा करणार असल्याचे त्यांनी सांगितले.
‘माणुसकी समुहा’चे निस्वार्थी कार्य पाहून प्रेरित झाल्याचे डॉ.महेंद्र गीते यांनी सांगितले. ‘माणुसकी समुहा’चे जळगाव जिल्हाध्यक्ष समाजसेवक गजानन क्षीरसागर यांनीही वृक्षारोपण ही काळाची गरज हे समजावून सांगितले. यावेळी ‘माणुसकी समूह’ ग्रुपचे सदस्य डॉ.ज्ञानेश्वर चव्हाण (दंत रोग तज्ज्ञ, नायर हॉस्पिटल, मुंबई ), रवींद्र कलाल, श्रीराम कलाल, गजानन क्षीरसागर, कडूबा चौधरी, स्वरा क्षीरसागर आदी उपस्थित होते.
