साईमत, अमळनेर : प्रतिनिधी
मायबोली अहिराणीतूनच शपथ घेईल म्हणत संपूर्ण विधानसभा वेठीस धरून विरोधक म्हणून सत्ताधाऱ्यांना ‘सळो की पळो’ करून सोडणाऱ्या तत्कालीन मुलुख मैदान तोफ माजी आमदार गुलाबराव वामनराव पाटील (वय ९०) यांचे मंगळवारी, २२ ऑगस्ट रोजी सायंकाळी साडे सात वाजता वृद्धापकाळाने निधन झाले. त्यांची अंत्ययात्रा बुधवारी, २३ रोजी दुपारी २ वाजता दहिवद, ता.अमळनेर येथून निघणार आहे.
गुलाबराव पाटील हे तीन वेळा एकूण १३ वर्षे जनता दलाचे आमदार होते. त्यांच्या शेतकऱ्यांसाठी शिंगाडे मोर्चा, सभागृहातून राजदंड पळविणे आदी भूमिका लक्षवेधी ठरल्या होत्या. त्यांच्या पश्चात दोन मुले, दोन मुली, सुना, नातवंडे असा परिवार आहे. ते गुणवंत पाटील यांचे वडील तर अमळनेर शिक्षण मंडळाचे अध्यक्ष हेमकांत पाटील यांचे आजोबा होत.
