‘जय भवानी, जय शिवाजी’च्या घोषणांनी परिसर दणाणला
साईमत/शेंदुर्णी/ प्रतिनिधी,
शेंदुर्णी शहरात छत्रपती शिवाजी महाराजांच्या अश्वारूढ पुतळ्याचे लोकार्पण जलसंपदा व आपत्ती व्यवस्थापन मंत्री गिरीश महाजन यांच्या हस्ते उत्साहात पार पडले. या ऐतिहासिक सोहळ्यामुळे संपूर्ण परिसर ‘जय भवानी, जय शिवाजी’च्या घोषणांनी दणाणून गेला.
भव्य कार्यक्रमाचे अध्यक्षस्थानी भाजप जिल्हाध्यक्ष चंद्रकांत बाविस्कर उपस्थित होते. याप्रसंगी जिल्हाधिकारी रोहन घुगे, नगराध्यक्ष गोविंद अग्रवाल, तहसीलदार नानासाहेब आगळे, तसेच नगरसेवक संजय गरुड, शरद बारी, जितू पाटील, जे.के.चव्हाण, कमलाकर पाटील, प्रदीप लोढा, अरविंद देशमुख, दीपक तायडे यांसह छत्रपती शिवाजी महाराज पुतळा समितीचे सदस्य उपस्थित होते.
पुतळ्याच्या अनावरण प्रसंगी फटाके फोडून आनंदोत्सव साजरा करण्यात आला. आकर्षक विद्युत रोषणाईने संपूर्ण शेंदुर्णी परिसर उजळून निघाला. उपस्थितांनी छत्रपती शिवाजी महाराजांची आरती केली, तर ‘जय भवानी, जय शिवाजी’च्या घोषणांनी ऐतिहासिक वातावरण निर्माण केले. इतिहासात प्रथमच शेंदुर्णीत अशा मोठ्या प्रमाणावर शिवप्रेमींचा जनसागर उसळला.
कार्यक्रमाचे प्रास्ताविक मुख्याधिकारी विवेक धांडे यांनी केले, तर सूत्रसंचालन अपूर्वा वाणी यांनी केले. नगराध्यक्ष गोविंद अग्रवाल म्हणाले, “गेल्या ४०-५० वर्षांपासून शेंदुर्णीकरांची छत्रपती शिवाजी महाराजांचा अश्वारूढ पुतळा उभारण्याची मागणी होती. मंत्री गिरीश महाजन यांच्या पुढाकारामुळे हे स्वप्न साकार झाले आहे.” त्यांनी शेंदुर्णी फ्रुटसेल सोसायटीचे चेअरमन संजय गरुड यांचे पुतळ्यासाठी जागा उपलब्ध करून दिल्याबद्दल आभार मानले.
कार्यक्रमानिमित्त नगराध्यक्षांच्या परिवाराकडून शिवप्रेमींकरिता शिवभोजनाचे आयोजन करण्यात आले. सोहळ्याच्या शेवटी नगरसेवक शांताराम गुजर यांनी उपस्थितांचे आभार मानले.या लोकार्पणाने शेंदुर्णी शहरात इतिहास साकार केला असून, शिवस्नेहींमध्ये अभूतपूर्व उत्साह निर्माण झाला आहे.
