अपघातात बाप-लेकाचा जागीच मृत्यू
जळगाव (प्रतिनिधी)-
रावेर तालुक्यातील बोर घाटात थार जीप आणि दुचाकीच्या अपघातात दुचाकीवरील बाप-लेकाचा जागीच मृत्यू झाल्याची घटना घडली. पिंटू बोडोले (वय ३०) असं मयत पित्याचे व रितीक बोडोले (वय ३) असं मुलाचे नाव आहे. पोलिसांनी थार गाडीच्या चालकाविरुद्ध गुन्हा दाखल केला.
पिंटू बोडोले हे कुटुंबासह भुसावळ येथे मजुरी करून उदरनिर्वाह चालवत होते. रविवारी ते पत्नी मालुबाई (वय २८) आणि दोन मुले यांच्यासह दुचाकीने भुसावळहून पाल येथे नातेवाईकांना भेटण्यासाठी निघाले होते.
दरम्यान, रात्री रावेर तालुक्यातील बोर घाटात खेरगावकडून भुसावळच्या दिशेने येणाऱ्या थार गाडीने त्यांच्या दुचाकीला धडक दिली. हा अपघात इतका भीषण होता की, पिंटू आणि त्यांचा लहान मुलगा रितीक याचा जागीच मृत्यू झाला. गरीब परिस्थितीत जीवन जगणाऱ्या या आदिवासी कुटुंबावर अचानक संकट कोसळले आहे.
या अपघातात जखमी मालुबाई बोडोले आणि लहान मुलगा टेंगुराम यांना पुढील उपचारासाठी फैजपूर येथे हलवले. पोलिसांनी थार गाडीच्या चालकाविरुद्ध गुन्हा दाखल करून तपास सुरू केला आहे.
