साईमत, अमळनेर : प्रतिनिधी
तालुक्यातील दहिवद येथे पोळा सण साजरा करत असताना सरपंचाला जातीवाचक शिवीगाळ करुन मारहाण केल्याची घटना गावातील महादेव मंदिराजवळ घडली. याप्रकरणी ११ जणांवर दंगलीचा व ॲट्रॉसिटीचा गुन्हा दाखल केला आहे.
सविस्तर असे की, अमळनेर तालुक्यातील दहिवद येथे गुरुवारी, १४ सप्टेंबर रोजी दुपारी चार वाजता पोळा सण साजरा करण्यासाठी बैल जोड्या आणण्यात आल्या होत्या. तेथे डीजेवर काहीजण नाचत असताना सरपंच देवानंद बहारे यांनी व्यवस्थित नाचा, असे सांगितले. त्यावेळी ज्याला रोजगार सेवक म्हणून ग्रामपंचायतमध्ये घेतले नाही, त्याने व त्याच्यासह ११ जणांनी त्यांना मारहाण केली. एकाने डोक्यात सळईने मारहाण केली तर एकाने हॉकी स्टिकने मारहाण केली. तसेच जातीवादी शिवीगाळ केली, अशी तक्रार बहारे यांनी पोलिसांना दिलेल्या जबाबात केली आहे. त्यावरुन ११ जणांवर गुन्हा दाखल केला आहे. तपास डीवायएसपी सुनील नंदावाळकर करीत आहे. गावात तणावपूर्ण शांतता आहे.
