साईमत, प्रतिनिधी, जळगाव
येथील आकाशवाणी चौकात मोटारसायकलस्वारास भरधाव गॅस सिलिंडर घेवून जाणाऱ्या ट्रकने चिरडल्याने जिल्हा उपनिबंधक कार्यालयात बैठकीसाठी येणाऱ्या कोल्हाडी(ता. बोदवड) येथील वि.का.सोसायटी सचिवांचा जागीच मृत्यू झाल्याची घटना मंगळवारी सकाळी 10.30 वाजेच्या सुमारास घडली.
जिल्हा उपनिबंधक कार्यालयातील सहकार विभागाची मंगळवारी बैठक आयोजित करण्यात आली होती. या बैठकीसाठी कोल्हाडी(ता. बोदवड) येथील वि.का.सोसायटी सचिव पंजाबराव बोरसे हे सकाळी बोदवड येथून दुचाकीने (क्र. एमएच 19, एसी 224) जळगावला यायला निघाले. ते शहरातील आकाशवाणी चौकात पोहचले त्या वेळी तेथे मागून भरधाव गॅस सिलिंडर घेऊन जाणाऱ्या ट्रकने (क्र. एमएच 04 जेयु 9596) त्यांच्या दुचाकीस जोरदार धडक दिली.
यात बोरसे मागील चाकाखाली आल्याने त्यांच्या डोक्याचा चेंदामेंदा झाला. त्यामुळे ते जागीच गतप्राण झाले. अपघात घडला तेव्हा परिसरात मोठा आवाज झाल्याने नागरिकांनी तेथे धाव घेतली. पोलिसही तत्काळ घटनास्थळी दाखल झाले. त्यांनी रुग्णावाहिका मागवून मृतदेह शासकीय वैद्यकीय महाविद्यालय व रुग्णालयात हलविला. याबाबत रामानंद पोलिसात ट्रकचालकावर गुन्हा दाखल करण्यात आला.
