‘ॐ’ गोंदलेले मनगट ठरतेय ओळखीचा धागा; अनोळखी मृतदेहाचा तपास सुरू
साईमत /भुसावळ / प्रतिनिधी
भुसावळ शहरातील नवोदय विद्यालयाच्या पाठीमागील परिसरात असलेल्या श्री. झोपे यांच्या विहिरीत एका अनोळखी इसमाचा मृतदेह आढळून आल्याने शहरात एकच खळबळ उडाली आहे. शनिवारी (दि. ४) सकाळच्या सुमारास ही घटना उघडकीस आली असून, भुसावळ तालुका पोलीस ठाण्यात अकस्मात मृत्यूची नोंद करण्यात आली आहे.
मिळालेल्या प्राथमिक माहितीनुसार, नवोदय विद्यालयाच्या मागील बाजूस असलेल्या विहिरीत एक मृतदेह पाण्यावर तरंगताना स्थानिक नागरिकांच्या निदर्शनास आला. घटनेची माहिती तात्काळ पोलिसांना देण्यात आली. माहिती मिळताच भुसावळ तालुका पोलिसांनी घटनास्थळी धाव घेत मृतदेह बाहेर काढण्याची कार्यवाही केली.
मृत इसमाचे वय अंदाजे ४५ ते ५० वर्षांच्या दरम्यान असल्याचा अंदाज व्यक्त करण्यात येत आहे. त्याच्या डोक्यावर टक्कल असून, ओळख पटवण्यासाठी पोलिसांनी काही ठळक खुणा नोंदवल्या आहेत. मयताच्या उजव्या मनगटावर ‘ॐ’ (ओम) हे अक्षर गोंदलेले असून, हातात लोखंडी कडे आणि काळा धागा बांधलेला आहे.
दरम्यान, मृतदेहाची ओळख अद्याप पटलेली नसल्याने पोलिसांसमोर आव्हान निर्माण झाले आहे. या इसमाचा कोणत्याही प्रकारे बेपत्ता झाल्याची नोंद असल्यास अथवा वरील वर्णनाशी साधर्म्य असलेल्या व्यक्तीबाबत कोणाकडे माहिती असल्यास त्यांनी तात्काळ भुसावळ तालुका पोलीस स्टेशनशी संपर्क साधावा, असे आवाहन पोलिसांनी केले आहे.
या घटनेमुळे परिसरात भीतीचे वातावरण निर्माण झाले असून, मृत्यूचे नेमके कारण काय, याचा शोध घेण्यासाठी पोलिसांकडून पुढील तपास सुरू आहे.
