साईमत / यवतमाळ/ प्रतिनिधी
पुसद शहरातील इंद्रप्रस्थ नगर परिसरात अवैधरीत्या गॅस सिलिंडर साठवून त्यांची व्यावसायिक विक्री करणाऱ्या प्रकरणावर स्थानिक गुन्हे शाखेने धडक कारवाई करत २१ गॅस सिलिंडर जप्त केले. या कारवाईत सुमारे ६० हजार रुपयांचा मुद्देमाल हस्तगत करण्यात आला आहे.
मधुकरलाल जाट यांच्या निवासस्थानी घरगुती वापरासाठी असलेले गॅस सिलिंडर बेकायदेशीररीत्या साठवून ते व्यावसायिक वापरासाठी विक्रीसाठी ठेवण्यात आल्याची माहिती पोलिसांना मिळाली होती. त्यानुसार छापा टाकण्यात आला. यावेळी १९ किलो वजनाचे १९ आणि पाच किलोचे २ असे एकूण २१ सिलिंडर जप्त करण्यात आले.
कारवाईदरम्यान संबंधित व्यक्तीकडे आवश्यक परवानग्या व कागदपत्रांची मागणी करण्यात आली. मात्र, समाधानकारक उत्तर न मिळाल्याने पोलिसांनी सिलिंडर जप्त करून पुढील कायदेशीर प्रक्रिया सुरू केली आहे.
ही कारवाई पोलिस निरीक्षक सतीश चव्हाण यांच्या मार्गदर्शनाखाली पोलिस उपनिरीक्षक धीरज बांदे, शरद लोखंडे यांच्यासह पथकातील मन्ना आडे, संतोष भोयर, तेजस राणे, सुभाष जाधव, रमेश राठोड, कुशल मुंडेकर, सुनील पंडागळे, रवींद्र शिरभे आणि राजेश जाधव यांनी संयुक्तपणे केली.
दरम्यान, नागरिकांनी आपल्या परिसरात अवैध गॅस साठा किंवा विक्री आढळल्यास तात्काळ पोलिसांना कळवावे, असे आवाहन करण्यात आले आहे.
