मध्यरात्री उड्डाणपूलजवळ थार गाडीने अचानक कट, रोकड आणि मोबाईल हिसकावले
साईमत / कोल्हापूर / प्रतिनिधी
कोल्हापूरच्या व्यापारी दिलीप भागोजी पाटील यांच्या कारला मध्यरात्री अज्ञात चार जणांनी अडवून तब्बल अडीच लाख रुपयांची रोकड आणि दोन मोबाईल चोरून नेल्याची धक्कादायक घटना सांगोल्यात घडली आहे. या प्रकरणी पाटील यांनी सांगोला पोलिस ठाण्यात तक्रार नोंदवली असून पोलीस तपास करत आहेत.
पाटील यांचे कोल्हापूरमध्ये वाहनांचे स्पेअर पार्टचे दुकान असून ते व्यवसायानिमित्त लातूर जिल्ह्यातील निलंगा येथील घराच्या बांधकामासाठी पैसे घेऊन जात होते. त्यांच्या सोबत पत्नी सत्यकला आणि चालक रामचंद्र साळुंखे होते. रात्री सुमारे दहा वाजण्याच्या सुमारास हॉटेलमध्ये जेवण करून ते पुढे निघाले.
रात्री अकराच्या सुमारास सांगोला येथील उड्डाणपूल जवळ काळ्या रंगाच्या, विना नंबरच्या ‘थार’ गाडीने त्यांच्या कारला कट मारून थांबवले. थारमधून उतरलेल्या एका व्यक्तीने चालकाजवळ येऊन वाद घातला आणि शिवीगाळ सुरू केली. यावेळी आणखी तीन जण कारजवळ आले.
चारही आरोपी पाटील व चालकाला धमकावत कारची डिकी उघडून दोन बॅगा हिसकावून नेल्या. त्यातील एका बॅगेत अडीच लाख रुपयांची रोकड होती, तसेच चालकाचे दोन मोबाईलही चोरी झाले.
आरोपींची पसार होण्याची परिस्थिती : लूटीनंतर आरोपी थार गाडीत बसून सोलापूरच्या दिशेने वेगाने निघून गेले. या घटनेमुळे पाटील कुटुंबीय मोठ्या धक्क्यात आले. मानसिक स्थिती सावरल्यानंतर त्यांनी सांगोला पोलिस ठाण्यात तक्रार दाखल केली. पोलीस पुढील तपास करत असून, आरोपींचा शोध घेण्यास सुरुवात केली आहे.
