भरदिवसा चौकात शाळकरी मुलीची छेडछाड आरोपीवर गुन्हा दाखल
साईमत / चाळीसगाव / प्रतिनिधी
शहरातील गजबजलेल्या नेताजी चौकात भररस्त्यावर एका अल्पवयीन शाळकरी मुलीची छेडछाड झाल्याची धक्कादायक घटना समोर आली आहे. या प्रकरणी संशयित आरोपीविरुद्ध विनयभंगासह पॉक्सो कायद्यांतर्गत गुन्हा दाखल करण्यात आल्याने शहरात संतापाची लाट उसळली आहे.
मिळालेल्या माहितीनुसार, चाळीसगाव तालुक्यातील एका गावात राहणारी १५ वर्षीय पीडित मुलगी ही शहरातील एका नामांकित हायस्कूलमध्ये शिक्षण घेत आहे. मंगळवारी (दि. २४) दुपारी सुमारे १२:३० वाजेच्या सुमारास शाळा सुटल्यानंतर ती पायी आपल्या ओझर गावाकडे निघाली होती. दरम्यान, नेताजी चौकातील महादेव मंदिराजवळ ती पोहोचताच, तेथे आधीपासून दबा धरून बसलेल्या संशयिताने तिचा पाठलाग करत तिला गाठले.
राजेंद्र महेंद्र पाटील (वय २५, रा. ओझर, ता. चाळीसगाव) असे संशयित आरोपीचे नाव असून, त्याने अचानक मुलीजवळ येत तिच्या अंगावरील ओढणी बळजबरीने ओढली. या प्रकारामुळे मुलगी क्षणभर घाबरली; मात्र तिने धैर्य दाखवत तत्काळ आरडाओरड सुरू केली. तसेच “मी घरी फोन करून तुझे नाव सांगते” असा इशाराही तिने आरोपीला दिला. मुलीचा आक्रमक पवित्रा पाहून आरोपीने घटनास्थळावरून पळ काढला.
या घटनेनंतर पीडित मुलीने धैर्याने पुढे येत पोलिसांत तक्रार दाखल केली. तिच्या फिर्यादीवरून चाळीसगाव शहर पोलीस ठाण्यात मंगळवारी रात्री ११ वाजता आरोपीविरुद्ध विनयभंग तसेच पॉक्सो कायद्यांतर्गत गुन्हा नोंदविण्यात आला आहे.
या प्रकरणाचा पुढील तपास पोलीस उपनिरीक्षक अरुण बाविस्कर करीत असून, आरोपीचा शोध सुरू आहे. दरम्यान, भरदिवसा गजबजलेल्या चौकात घडलेल्या या प्रकारामुळे शहरातील सुरक्षेचा प्रश्न पुन्हा ऐरणीवर आला आहे. नागरिकांकडून आरोपीवर कठोर कारवाईची मागणी करण्यात येत आहे.
