२४ मार्चपासून आरक्षण सुरु, तिकीट मिळवण्यासाठी रेल्वे संकेतस्थळ वापरा
साईमत भुसावळ प्रतिनिधी
मध्य रेल्वे प्रवाशांच्या वाढत्या गर्दीचा विचार करून, आगामी ३ आणि ४ एप्रिल रोजी लोकमान्य टिळक टर्मिनस–नागपूर तसेच पुणे–नागपूर दरम्यान विशेष गाड्या चालवणार आहे.
लोकमान्य टिळक टर्मिनस–नागपूर मार्गावरील विशेष गाडी क्र. ०१०२१ ही ३ एप्रिल रोजी रात्री १२.५५ वाजता लोकमान्य टिळक टर्मिनसहून सुटेल आणि त्याच दिवशी दुपारी ३.४५ वाजता नागपूर येथे पोहोचेल. नागपूर–लोकमान्य टिळक टर्मिनस परतीची गाडी क्र. ०१०२२ ३ एप्रिल रोजी रात्री ८ वाजता नागपूरहून सुटेल आणि दुसऱ्या दिवशी सकाळी ११.४५ वाजता लोकमान्य टिळक टर्मिनस पोहोचेल. या गाड्यांचे प्रमुख थांबे ठाणे, कल्याण, नाशिक रोड, मनमाड, जळगाव, भुसावळ, मलकापूर, शेगाव, अकोला, मूर्तिजापूर, बडनेरा, धामणगाव आणि वर्धा येथे आहेत.
पुणे–नागपूर मार्गावरील विशेष गाडी क्र. ०१४६७ ही ३ एप्रिल रोजी दुपारी ३.५० वाजता पुणेहून सुटेल आणि दुसऱ्या दिवशी सकाळी ६.३० वाजता नागपूरमध्ये पोहोचेल. परतीची गाडी क्र. ०१४६८ ४ एप्रिल रोजी नागपूरहून सकाळी ८ वाजता सुटेल आणि त्याच दिवशी रात्री ११.३० वाजता पुणे पोहोचेल. या गाड्यांचे थांबे उरुळी, दौंड कॉर्ड लाईन, अहिल्यानगर, बेलापूर, कोपरगाव, मनमाड, जळगाव, भुसावळ, मलकापूर, शेगाव, अकोला, बडनेरा, धामणगाव आणि वर्धा येथे आहेत.
या विशेष गाड्यांची संरचना २ वातानुकूलित द्वितीय श्रेणी, ४ वातानुकूलित तृतीय श्रेणी, ८ शयनयान, ४ सामान्य द्वितीय आणि १ सामान्य द्वितीय श्रेणी-सह-गार्ड ब्रेक व्हॅन अशी आहे.
विशेष गाड्यांसाठी आरक्षण २४ मार्चपासून सर्व संगणकीकृत आरक्षण केंद्रांवर, रेल्वे संकेतस्थळावर तसेच रेलऑन ॲपद्वारे सुरु होईल. प्रवाशांनी आपले तिकीट लवकर आरक्षित करून प्रवासाची खात्री करणे आवश्यक आहे.
या विशेष गाड्या गर्दी कमी करण्यास आणि प्रवाशांना अधिक सोयीस्कर प्रवास अनुभव देण्यास महत्त्वाची ठरतील.
