रावेर तालुक्यातील गारखेडा उपकेंद्रात दुर्दैवी प्रसूती; प्रशासनाची कठोर कारवाई
साईमत/रावेर/ प्रतिनिधी
रावेर तालुक्यातील गारखेडा उपकेंद्र परिसरात १० मार्च रोजी घडलेल्या नवजात बाळाच्या दुर्दैवी मृत्यूप्रकरणी जिल्हा परिषद जळगावच्या मुख्य कार्यकारी अधिकारी मिनल करनवाल यांनी तात्काळ कारवाई केली आहे. या प्रकरणात गारखेडा आरोग्य उपकेंद्रातील कंत्राटी आरोग्य सेविका नंदा कडू पाटील यांना त्यांच्या सेवेतून कमी करण्यात आले आहे.
घटना १० मार्च रोजी मध्यरात्री सुमारे १ वाजेच्या सुमारास घडली. तिसऱ्या खेपेची गरोदर रुकसाना अजित तडवी या महिलेने प्रसूती वेदना सुरू झाल्यावर संबंधित आशा सेविकेने तिला तत्काळ उपकेंद्रात दाखल केले. परंतु, उपकेंद्रातील कंत्राटी आरोग्य सेविका नंदा कडू पाटील त्या वेळेस मुख्यालयी असल्यामुळे उपस्थित राहू शकल्या नाहीत.
प्रसूतीची वेळ वाढत असल्याने उपकेंद्रात उपस्थित आशा सेविकेने आपल्या ANM प्रशिक्षणाचा उपयोग करून उपलब्ध वैद्यकीय साधनसामग्रीच्या सहाय्याने प्रसूती प्रक्रिया पार पाडली. प्रसूती सुरक्षितरित्या पार पडली, मात्र नवजात बाळ रडत नसल्यामुळे त्याला तात्काळ पाल ग्रामीण रुग्णालयात रेफर करण्यात आले. रुग्णालयात प्राथमिक उपचारानंतर बाळ अधिक उपचारासाठी सावदा येथे हलविण्यात आले, परंतु रस्त्यात पोहोचण्याआधीच त्याचा मृत्यू झाला.
जिल्हा परिषद जळगाव प्रशासनाने या घटनेची गंभीर दखल घेत सखोल चौकशी सुरू केली असून प्रथमदर्शनी तपासात कंत्राटी आरोग्य सेविकेच्या अनुपस्थितीमुळे आरोग्य सेवेवर प्रश्न निर्माण झाल्याचे निष्पन्न झाले. त्यामुळे नंदा कडू पाटील यांच्यावर सेवेतून कमी करण्याची कारवाई करण्यात आली आहे.
जिल्हा परिषद प्रशासनाने ग्रामीण भागातील आरोग्य सेवा अधिक सक्षम व तत्पर राहण्यासाठी आवश्यक त्या सर्व उपाययोजना करण्याचे आश्वासन दिले आहे. प्रशासनाचा उद्देश नागरिकांना वेळेत व योग्य आरोग्य सेवा मिळावी यासाठी उपाययोजना सुनिश्चित करणे असल्याचे सांगितले आहे.
ही घटना ग्रामीण आरोग्य व्यवस्थेतील दुर्बलता अधोरेखित करते आणि उपकेंद्रातील तत्परता व कर्मचारी व्यवस्थापन सुधारण्याची गरज अधोरेखित करते.
