माधवनगर परिसरातील घटना; निवृत्त कर्मचाऱ्याच्या बंद घराचे कुलूप तोडून चोरट्यांची धाड
साईमत/चाळीसगाव/प्रतिनिधी :
शहरातील गजबजलेल्या माधवनगर परिसरात अज्ञात चोरट्यांनी भरवस्तीतच धाडसी घरफोडी करत तब्बल २ लाख ५२ हजार ५०० रुपयांचा मुद्देमाल लंपास केल्याची घटना उघडकीस आली आहे. हॉटेल राणी पार्क समोरील भागात घडलेल्या या प्रकारामुळे नागरिकांमध्ये भीतीचे वातावरण पसरले आहे.
पोलीस सूत्रांनी दिलेल्या माहितीनुसार, माधवनगर येथे भारत सुलतान संसारे (वय ५९) हे सेवानिवृत्त कर्मचारी आपल्या कुटुंबासह राहतात. १५ ते २५ फेब्रुवारी या कालावधीत त्यांचे संपूर्ण कुटुंब बाहेरगावी गेले होते. घर बंद असल्याची संधी साधून अज्ञात चोरट्यांनी घराचे मुख्य कुलूप तोडून आत प्रवेश केला.
घरातील कपाट फोडून चोरट्यांनी २ लाख रुपयांची रोख रक्कम आणि सुमारे ५२ हजार ५०० रुपये किमतीचे चांदीचे दागिने असा एकूण २ लाख ५२ हजार ५०० रुपयांचा ऐवज चोरून नेला. बुधवारी (२५ फेब्रुवारी) सकाळी सुमारे ९.३० वाजता हा प्रकार उघडकीस आला. घरी परतल्यानंतर कुलूप तुटलेले आणि घरातील साहित्य अस्ताव्यस्त अवस्थेत पाहून संसारे कुटुंबीयांना धक्का बसला.
घटनेची माहिती मिळताच भारत संसारे यांनी तात्काळ चाळीसगाव शहर पोलीस ठाण्यात धाव घेत तक्रार दाखल केली. त्यांच्या फिर्यादीवरून अज्ञात चोरट्यांविरोधात गुन्हा नोंदविण्यात आला असून पुढील तपास पोलीस उपनिरीक्षक दिलीप रोकडे करीत आहेत.
भरवस्तीत घडलेल्या या घरफोडीमुळे परिसरात खळबळ उडाली असून, पोलीस प्रशासनाने रात्रीच्या गस्तीत वाढ करण्याची मागणी नागरिकांकडून केली जात आहे.
