अर्धवट जळालेला मृतदेह पाहून परिसरात दहशत
साईमत/एरंडोल/प्रतिनिधी
एरंडोल तालुक्यातील पद्मालय गणेश देवस्थानाजवळील जंगलात अज्ञात महिलेचा अर्धवट जळालेला मृतदेह सापडल्याने परिसरात एकच खळबळ उडाली आहे. प्राथमिक तपासात दिसून आले आहे की, या घटनेमागे नियोजनबद्ध खून असून, पुरावा नष्ट करण्याच्या हेतूने मृतदेह जंगलात फेकण्यात आला आहे.
घटनास्थळी माहिती मिळाल्याप्रमाणे, पद्मालय ते नागदुली रस्त्यावर असलेल्या जंगलात काही गुराखी त्यांची गुरे चारवायला गेले होते. यावेळी त्यांनी जंगलात एका महिलेचा मृतदेह आढळला. मृतदेहाच्या केवळ पायांचे अवशेष स्पष्टपणे दिसत होते, तर उरलेले अवयव अर्धवट जळालेल्या अवस्थेत होते. या घटनेची त्वरित माहिती स्थानिक ग्रामस्थांनी पोलिसांना दिली आणि एरंडोल पोलीस स्टेशनला कळवण्यात आली.
घटनास्थळी त्वरित पोलीस पथक दाखल झाले. पोलिस अधीक्षक डॉ. महेश्वर रेड्डी, अप्पर पोलीस अधीक्षक कविता नेरकर, उपविभागीय पोलीस अधिकारी विनायक कोते, एरंडोल पोलीस स्टेशनचे निरीक्षक निलेश गायकवाड आणि स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांनी घटनास्थळ पाहणी केली. या ठिकाणी श्वानपथक, ठसे पथक आणि मोबाईल फॉरेन्सिक व्हॅन पथक दाखल झाले, तसेच आवश्यक नमुने ताब्यात घेतले गेले आहेत.
प्राथमिक तपासात असे दिसून आले आहे की, महिलेच्या मृत्यूसाठी ज्वलनशील पदार्थाचा वापर करून तिला जाळण्यात आले आहे. संध्याकाळी ५ वाजता मृतदेह शासकीय वैद्यकीय महाविद्यालय व रुग्णालय, जळगाव येथे शवविच्छेदनासाठी पाठवण्यात आला.
सदर घटनेत अद्याप मृत महिलेची ओळख पटलेली नाही. पोलीस अधिकारी सांगतात की, ओळख पटविणे हा प्रमुख आव्हानात्मक टप्पा आहे. प्रथमदर्शनी तपासात असे दिसून आले आहे की, ही घटना नियोजनबद्ध खून असून, पुरावा नष्ट करण्यासाठी केलेली आहे.
घटनास्थळ आणि परिसरात मोठी खळबळ उडाली असून, पोलिसांची विविध पथके तपासासाठी रवाना करण्यात आली आहेत. पोलीस तपास सुरू असून, अधिक माहिती लवकरच जाहीर केली जाणार आहे.
