दुसरा चालक गंभीर जखमी, उपचारासाठी दाखल केले रुग्णालयात
साईमत/जळगाव/प्रतिनिधी :
शहरातून भुसावळकडे जाणाऱ्या महामार्गावरील स्वामी नारायण मंदिराजवळ दोन ट्रकच्या धडकेत एक ट्रक चालक जागीच ठार तर दुसरा चालक गंभीर जखमी झाला झाल्याची घटना मंगळवारी, २४ जून रोजी सकाळी साडे सात वाजेच्या सुमारास घडली. दरम्यान, अपघाताचे नेमके कारण अद्याप स्पष्ट झालेले नाही. मात्र, प्राथमिक अंदाजानुसार एका ट्रकने रस्ता ओलांडताना वेगावर नियंत्रण गमावल्यामुळे ही धडक झाली असावी, असा अंदाज वर्तवला जात आहे.
शहरातून भुसावळकडे जाणाऱ्या महामार्गावरील स्वामी नारायण मंदिराजवळ ओडिशा पासिंगचा ट्रक (क्र.ओडी-१५-सी-२९६३) आणि राजस्थान पासिंगचा ट्रक (क्र.आरजे-१४-जीटी-०४२१) यांच्यात समोरासमोर जबरदस्त धडक झाली. धडक इतकी तीव्र होती की, एक ट्रक चालक केबिनमध्ये अडकून गेला होता. अपघातानंतर परिसरात एकच खळबळ उडाली आहे. स्थानिक नागरिकांनी धाव घेऊन अडकलेल्या चालकाला वाचविण्याचे शर्थीचे प्रयत्न केले. केबिन दोरीच्या सहाय्याने ओढून त्याला बाहेर काढण्यात आले. मात्र, तोपर्यंत त्याचा मृत्यू झाला होता. दुसऱ्या ट्रकचा चालक गंभीर जखमी झाला आहे. तसेच त्याच्या डोळ्याला मोठी इजा झाली आहे. त्यास तातडीने उपचारासाठी रुग्णालयात दाखल केले आहे.
ठप्प झालेली वाहतूक पोलिसांनी केली सुरळीत
अपघातामुळे महामार्गावरील वाहतूक काही काळासाठी ठप्प झाली होती. घटनेची माहिती मिळताच घटनास्थळी एमआयडीसीचे पोलीस आणि वाहतूक विभागाचे अधिकारी दाखल झाले होते. त्यांनी अपघातस्थळी पंचनामा करून ठप्प झालेली वाहतूक सुरळीत केली. दरम्यान, पोलीस अधिक तपास करीत आहे. ट्रकचालक कोणत्या दिशेने, कोणत्या वेगात जात होते, त्याचा तपास करण्याचे काम सुरु आहे.
