चालक पोलिसांच्या ताब्यात, सीसीटीव्ही कॅमेऱ्यात अपघात कैद
साईमत/जळगाव/प्रतिनिधी :
शहरात गुरुवारी, १९ जून रोजी रात्री ८ वाजेच्या सुमारास एका मद्यधुंद चारचाकी चालकाने केलेल्या भीषण ‘हिट अँड रन’ अपघातात ४५ वर्षीय वंदना सुनील गुजराथी यांचा शुक्रवारी उपचारावेळी मृत्यू झाला आहे. अपघातात अन्य दोघांनाही गंभीर दुखापत झाली आहे. याप्रकरणी संशयित आरोपी चालकाला पोलिसांनी ताब्यात घेतले आहे. ही घटना शहरातील महाबळ ते वाघनगर रस्त्यावर घडली. दरम्यान, हा संपूर्ण अपघात सीसीटीव्ही कॅमेऱ्यात कैद झाला आहे.
शहरातील वाघ नगरातील मोंटू शिवपाल सैनी हा कार (क्र. एमएच १९, ईपी १६९४) घेवून भरधाव वेगाने जात होता. महाबळ परिसरातील खासगी क्लासेसजवळ त्याने अनेक वाहनांना धडक दिली. त्यात वाहन चालक गंभीर जखमी झाले. तसेच महाबळ परिसरातील रहिवासी वंदना सुनील गुजराथी १९ जून रोजी रात्री ८ वाजेच्या सुमारास रस्त्याने पायी जात होत्या. त्याचवेळी शहराकडून वाघनगरकडे भरधाव वेगात येणाऱ्या कार चालक मोंटूने त्यांना ओव्हरटेक करताना जोरदार धडक दिली. धडक इतकी भीषण होती की, वंदना गुजराथी १५ ते २० फूट दूर फेकल्या गेल्या. एवढ्यावरच न थांबता, मद्यधुंद अवस्थेतील वाहन चालकाने त्याच वेगात पुढे जात आणखी दोघांना धडक दिली. त्याने वाघनगर परिसरातील काही घरांच्या बाहेरील कुंड्या आणि बाकही तोडले.
सर्व प्रकारानंतर अखेर एका ठिकाणी चिखलात वाहन फसल्याने आरोपी चालकाने तिथून पळ काढून घर गाठले. घटनेची माहिती मिळताच रामानंद नगर आणि तालुका पोलीस ठाण्याचे कर्मचारी तात्काळ घटनास्थळी दाखल झाले. रामानंद नगर पोलिसांनी तपास करून मद्यधुंद वाहन चालक मोंटू सैनी याला ताब्यात घेतले आहे. जखमी वंदना गुजराथी यांना काही नागरिकांनी तात्काळ खासगी रुग्णालयात उपचारासाठी दाखल केले होते. मात्र, शुक्रवारी २० जून रोजी सकाळी ७ वाजेपूर्वी त्यांच्यावर उपचार सुरु असतांना त्यांचा मृत्यू झाल्याचे सांगण्यात आले.
पब्लिक मारनंतर केले पोलिसांच्या स्वाधीन
अनेकांना धडक देणाऱ्या वाहनचालकाचा परिसरातील नागरिकांनी पाठलाग केला. सैनी हा दर्गा परिसरात वाहन सोडून पसार झाला होता. पाठलाग करणाऱ्यांनी त्याला कोल्हे हिल्स परिसरात पकडले. त्यानंतर त्याला पब्लिक मार दिल्यानंतर पोलिसांच्या स्वाधीन केले. रामानंद नगर पोलिसांनी सैनीला ताब्यात घेत त्याचे वाहनही जप्त करुन त्याच्याविरुद्ध गुन्हा दाखल केला आहे.
गतिरोधकअभावी घडताहेत अपघात
महाबळ ते वाघनगर रस्त्यावर मोठ्या प्रमाणात उतार असल्याने याठिकाणी नेहमीच अपघात होतात. भरधाव वेगात येणाऱ्या वाहनांवर लगाम घालण्यासाठी याठिकाणी तात्काळ स्पीड ब्रेकर (गतिरोधक) बसविण्यात यावे, अशी मागणी स्थानिक नागरिकांनी केली आहे.
