पिंप्राळा परिसरात एलेमेंटरी परीक्षेचा वार्षिक गुणगौरव सोहळा
साईमत/जळगाव/प्रतिनिधी :
मुले सकारात्मक पध्दतीने घडतात. त्यांना त्यांच्या आवडीनुसार काम करू द्या. अनेकवेळा पालकांकडून मुलांच्या कला दाबल्या जातात. पालक त्यांच्यावर दडपण टाकतात. अशातच चित्रकला हा पण अभ्यासाचा एक भाग आहे. त्यामुळे पालकांनी मुलांना रागवू नये. मुलांना चित्रकलेतही ‘करिअर’ करता येणार असल्याचे भुसावळ येथील सेंट्रल रेल्वे सिनियर सेकंडरी इ.एम.स्कुलचे सेवानिवृत्त ज्येष्ठ कलाशिक्षक राजेंद्र जावळे यांनी सांगितले. शहरातील पिंप्राळा परिसरातील कलादर्शन ड्राॅईंग क्लासेसतर्फे एलेमेंटरी, इंटरमिजिएट परीक्षेचा वार्षिक गुणगौरव सोहळा नुकताच पार पडला. त्यावेळी ते बोलत होते. कार्यक्रमाला प्रमुख पाहुणे म्हणून अरविंद सोनवणे, गिरीष डेरे, जितेंद्र चौधरी, नृत्यकला दिग्दर्शक नरेश बागडे आदी उपस्थित होते. गुणगौरव सोहळ्यात विद्यार्थ्यांना उपस्थित मान्यवरांच्या हस्ते स्मृतिचिन्ह (ट्राॅफी) देण्यात आले.
भुसावळ येथील कलाक्षेत्रातील आवड असणारी राशी पाटील ही विद्यार्थिनी दिव्यांग आहे. तिने तोंडात ब्रश धरून पोट्रेट आणि जिभेच्या साहाय्याने पियानोवर एक गीत सर्वांसमोर प्रत्यक्षदर्शी दाखवले. हे सर्व लाईव्ह बघितल्यानंतर उपस्थित प्रमुख पाहुणे, पालक व विद्यार्थ्यांनी तिचे स्वागत केले. तिच्या कलेबद्दल असलेली आस्था, जिद्द, चिकाटी पाहुन प्रभावित झाल्याचे पु.ना. गाडगीळ ॲण्ड सन्सचे व्यवस्थापकांनी सांगितले. यशस्वीतेसाठी अभिराज चव्हाण, दक्ष पाटील, भाग्यश्री चव्हाण, तेजस्विनी चव्हाण, चैतन्य पाटील, ओंकार जोशी यांनी परिश्रम घेतले. प्रास्ताविक विजय चव्हाण तर सुत्रसंचालन जान्हवी जोशी, मनिषा कुळकर्णी यांनी केले.
