वराडे परिवाराने वृक्षारोपणासह समाजबांधवांना दिली ग्रंथाची भेट
साईमत/जामनेर/प्रतिनिधी :
सत्यशोधक समाजाचे प्रचारक, जळगाव जिल्हा सचिव तथा जामनेर तालुक्यातील टाकळी खुर्द येथील रहिवासी रमेश वराडे यांचे वडील माजी ग्रा.पं.सदस्य शेनफडू तुकाराम वराडे हे गेल्या २ मे रोजी निसर्गात विलीन झाले. महात्मा फुले यांनी स्थापन केलेल्या सार्वजनिक सत्यशोधक पद्धतीने त्यांचा दशक्रिया विधी आणि गंधमुक्तीचा कार्यक्रम त्यांचा मुलगा रमेश यांनी स्वत: सर्व महापुरुषांच्या पूजनासह कुलदैवत पूजन करून नुकताच टाकळी खुर्द येथे पार पडला. त्यांच्या स्मृतीप्रित्यर्थ लाल चंदन, निंब आदी वृक्षांचे वृक्षारोपण करण्यात आले. उपस्थित समाज बांधवांना महात्मा फुले लिखित विधीचे ग्रंथ भेट देण्यात आले.
कार्यक्रमात आगामी शैक्षणिक वर्षात विद्यार्थ्यांना शालेय साहित्याची भेट देण्याचा संकल्प करण्यात आला. तसेच रात्री सर्व गावासाठी ‘सत्यशोधक’ हा चित्रपट दाखविण्यात आला. चित्रपट पाहण्यासाठी शेकडो समाज बांधव उपस्थित होते. यावेळी जिल्हा संघटक कैलास महाजन यांनी सत्यशोधक विधी स्वतः का करायचा, याविषयी समाज बांधवांना मार्गदर्शन केले.
यांच्याकडून मिळाली प्रेरणा
कार्यक्रमाची प्रेरणा सत्यशोधक समाजाचे राज्याध्यक्ष अरविंद खैरनार, सचिव डॉ.सुरेश झाल्टे, जिल्हाध्यक्ष पी.डी.पाटील, सांस्कृतिक संघाचे राज्य प्रभारी भगवान रोकडे यांच्याकडून मिळाली.
यांची होती उपस्थिती
कार्यक्रमाला जिल्हाध्यक्ष रवींद्र तीतरे, सत्यशोधक समाजाचे प्रचारक पवन माळी, योगेश कोलते, क्षत्रिय माळी समाजाचे अध्यक्ष प्रा.उत्तम पवार, मुकुंदा माळी, योगेश झाल्टे, अरूण रोकडे, अरुण पाटील, माजी सरपंच समाधान वराडे, सारंगधर अहिरे, मंगलदास अहिरे, बाळू चवरे, संतोष माळी, संजय माळी, दीपक माळी, विरेंद्र अहिरे, सुभाष जगताप, शिवदास महाजन यांच्यासह बहुजन समाज बांधव उपस्थित होते.
