नमो शेतकरी योजनेतील लाडक्या बहिणींना फक्त पाचशे रूपये !
मुंबई (प्रतिनिधी)-
राज्य सरकारच्या ‘लाडकी बहीण’ योजनेतील आठ लाख लाभार्थी महिलांना यापुढे दरमहा फक्त ५०० रुपयेच मिळणार आहेत. राज्य शासनाने नमो शेतकरी योजनेतील लाभार्थी महिलांची छाननी केली आठ लाख महिला लाडकी बहीण योजनेचाही लाभ घेत असल्याचे उघड झाले. एकाच लाभार्थ्याला दोन सरकारी योजनांचा लाभ मिळणार नाही, या अटीमुळे आता त्या महिलांना लाडकी बहीण योजनेत केवळ ५०० रुपयेच मिळणार आहेत.
नमो शेतकरी योजनेत महिलांना दरवर्षी ६,००० रुपये मिळतात. केंद्र शासनाच्या पंतप्रधान किसान सन्मान निधीमधूनही त्यांना ६,००० रुपये मिळतात. एकूण मिळकत १२,००० रुपये झाल्यामुळे त्यांना आता लाडकी बहीण योजनेतून फक्त ५०० रुपये प्रति महिना मिळणार आहे. राज्य सरकारने २०२३ मध्ये पंतप्रधान किसान सन्मान निधीच्या धर्तीवर ‘नमो महासन्मान निधी योजना’ सुरु केली होती. या योजनेंतर्गत राज्यातील शेतकऱ्यांना तीन टप्प्यांत वार्षिक ६,००० रुपये म्हणजे दर चार महिन्यांनी २,००० रुपये बँक खात्यात थेट जमा होतात.
लाडकी बहीण योजनेचा एप्रिल महिन्याचा १०वा हप्ता येत्या ३० एप्रिल रोजी अक्षय्य तृतीयेच्या मुहूर्तावर खात्यात जमा केला जाणार आहे. आता ही कपात महिलांमध्ये नाराजीचे कारण ठरू शकते.
