रामानंदनगरात तरूणाची गळफासाने आत्महत्या
जळगाव (प्रतिनिधी) –
रामानंदनगर परिसरात राहणाऱ्या २३ वर्षीय तरुणाने राहत्या घरात गळफास घेवून आत्महत्या केल्याची घटना बुधवारी रात्री उघडकीस आली. रामानंदनगर पोलिसात अकस्मात मृत्यूची नोंद करण्यात आली आहे.
कुणाल अनिल महाजन (वय २३) असे मयत तरुणाचे नाव आहे. कुणाल महाजन रामानंदनगरात आई, वडील व मोठ्या भावासह वास्तव्यास होता. रस्त्यांच्या कामाच्या ठिकाणी सुपरवायझर म्हणून तो कामाला होता.बुधवारी रात्री कुणाल घराच्या मागच्या खोलीत गेला. तेथे गळफास घेवून त्याने जीवनयात्रा संपविली. त्याच्या आईने दरवाजा तीन वेळेस ठोठावला पण, कुलर सुरू असल्यामुळे मुलगा गाढ झोपेत असेल म्हणून आईनेही पुन्हा दरवाजा ठोठावला नाही.
अखेर रात्री १०.३० वाजता वडिल व मोठ्या भावाने पुन्हा दरवाजा ठोठावल्यावर आतून कुठलाही आवाज आला नाही, म्हणून दरवाज्याला धक्का देत दरवाजा उघडल्यावर त्यांना कुणाल गळफास घेतलेल्या अवस्थेत आढळून आला. मुलाचा मृतदेह पाहुन कुटूंबियांनी आक्रोश केला. मृतदेह शासकीय वैद्यकीय महाविद्यालय व रुग्णालयात हलविण्यात आला होता. आत्महत्येचे कारण मात्र समजू शकलेले नाही.
