माजी नगराध्यक्ष ॲड. हरीश रावळ यांचे होतेय सर्वत्र कौतुक
साईमत/मलकापूर/प्रतिनिधी :
शहरातून नळगंगा नदी जाते. या नदीवर गेल्या पाच सहा वर्षांपासून उन्हाळ्यात मातीचा बंधारा टाकून पाणी थांबविण्याचे कार्य लोकसहभागातून नगराध्यक्ष हरीश रावळ करतात. त्यामुळे आज ४५ फूट खोल व एक किलोमीटर लांब व नदीच्या दोन्ही पात्र भरलेला बंधारा तयार झाला आहे. त्यामुळे शहराला गोड पाण्याचा भरपूर फायदा होत आहे. अशा लोकसहभागाच्या कार्यामुळे हरीश रावळ यांचे सर्वत्र कौतुक होत आहे.
गेल्या पाच-सात वर्षापासून नळगंगा नदीमध्ये माता महाकाली प्रभागाजवळ रोहिदास नगरच्या बाजूला नळगंगा नदीपात्रात लोकसहभागातून मातीचा जवळ-जवळ ५० फूट उंचीचा बंधारा नगराध्यक्ष हरीश रावळ यांनी बांधला.दरवर्षी बंधाऱ्याची दुरुस्ती करून त्यात पोकलेन लावून नदीतील गाळ व मुरूम टाकून पाणी थांबविण्यात येते. आज परिसरात ४५ फूट खोल व नदीचे दोन्ही पात्र तुडूंब भरलेले पाणी जवळपास एक किलोमीटर दूरपर्यंत थांबलेले आहे. त्यामुळे लाखो-करोडो लिटर पाणी जमिनीत मुरत आहे.
शहरवासियांची भागतेय तहान
या भागातील खारे पाणी गोड होऊन हातपंप आणि विहिरींना भरपूर पाणी लागले आहे. वरून दिसेल असे पाणी पोहोचले आहे. नदीच्या त्या पलीकडे ज्या लोकांच्या शेती आहे. त्यांनाही बंधाऱ्यामुळे भरपूर फायदा होत आहे. गेल्या एक महिन्यांपासून मलकापूर शहराला बंधाऱ्यातून जुन्या जॅकवेलवरून पाणीपुरवठा करण्यात येतो. पूर्णा नदीला नेहमी पूर येत असल्याने धोपेश्वर येथून नगरपालिकेचा पाणीपुरवठा आहे तो बरेचवेळा खंडित होतो. परंतु हा पाणीपुरवठा अखंडितपणे सुरु आहे. त्यामुळे मलकापूर शहरवासियांची तहान भागवत आहे.
