साईमत, चाळीसगाव : प्रतिनिधी
शहरातील देशमुख वाडा येथे राहणाऱ्या २७ वर्षीय तरूणाला टेलीग्राम व व्हॉटस्ॲपच्या माध्यमातून वेगवेगळे टास्क देवून त्यांच्याकडून ऑनलाईन पध्दतीने वेळोवेळी पैसे घेवून कोणताही परतावा न देता तब्बल १२ लाख ७९ हजार ३७५ रूपयांची ऑनलाईन फसवणूक करुन गंडविल्याची घटना मंगळवारी, १८ जून रोजी घडली आहे. याप्रकरणी रात्री साडेआठ वाजता जळगाव सायबर पोलीस ठाण्यात फसवणुकीचा गुन्हा दाखल केला आहे.
चाळीसगाव शहरातील देशमुख वाडा येथे विशाल रामराव सूर्यवंशी (वय २७) हा तरूण वास्तव्याला आहे. खासगी नोकरी करून तो आपला उदरनिर्वाह करतो. गेल्या १० मे २०२४ रोजी विशालला प्लेक्स मुव्हीज या टेलीग्रामवर तसेच व्हॉटस्ॲपवर आणि कस्टमर केंअर व्हॉटस्ॲप क्रमांकावरून फोन व मॅसेज करून त्याला टास्क पूर्ण करण्याचे बहाणा करून त्याचा विश्वास संपादन केला. त्यानंतर विशालकडून वेळोवेळी बँक खात्यातून ऑनलाईन पध्दतीने १४ लाख ३२ हजार ४०७ रूपये घेतले. त्यातील १ लाख ५३ हजार ०३२ रूपये परतावा केला. परंतु उर्वरित रक्कम १२ लाख ७९ हजार ३७५ परत दिली नाही.
दरम्यान, आपली फसवणूक झाल्याचे विशालच्या लक्षात आले. त्यानंतर १८ जून रोजी रात्री साडेआठ वाजता जळगाव येथील सायबर पोलिसात धाव घेवून फिर्याद दिली. त्यानुसार जळगाव सायबर पोलीस ठाण्यात फसवणुकीचा गुन्हा दाखल केला आहे. पुढील तपास पोलीस निरीक्षक दत्तात्रय निकम करीत आहे.
