साईमत, पाचोरा : प्रतिनिधी
खरीप हंगामाच्या लागवडीला मोठ्या प्रमाणात सुरुवात झाली आहे. परिसरातील प्रमुख पीक असणारे कापूस बियाणे सध्या बाजारात उपलब्ध होत नसल्याने कापूस बियाण्याची टंचाई भासताना दिसत आहे. यासंदर्भात भारतीय जनता पार्टीचे पाचोरा-भडगाव विधानसभा निवडणूक प्रमुख अमोल शिंदे यांनी आवाज उठविला आहे. प्रांताधिकाऱ्यांना भाजपा पदाधिकाऱ्यांच्या माध्यमातून निवेदन दिले आहे. यावेळी आयोजित पत्रकार परिषदेच्या माध्यमातून त्यांनी या विषयाला वाचा फोडली.
पाचोरा व भडगाव तालुक्यातील शेतकरी खरीप हंगाम लागवडीच्या तयारीला लागले आहे. आपल्या शेतीची मशागत करून लागवडीसाठी त्यांना कापूस पिकांच्या बियाण्याची टंचाई भासत असल्याने पाचोरा व भडगाव तालुक्यातील शेतकऱ्यांना मोठ्या अडचणीला सामोरे जावे लागत आहे. गेल्या काळातही दुष्काळ सदृश्‍य तालुक्याच्या नावाने पाचोरा व भडगाव तालुक्यातील शेतकऱ्यांची दिशाभूल झाली आहे. शेजारील चाळीसगाव तालुक्यातील आ.मंगेश चव्हाण यांनी त्यांचा चाळीसगाव तालुका दुष्काळग्रस्त घोषित करून घेण्याकरिता विशेष प्रयत्न करून जवळपास १३३ कोटीचे पॅकेज चाळीसगाव तालुक्याला मंजूर करून घेतले. त्यामुळे तेथील शेतकऱ्यांना भरीव अशी मदत शासनाकडून मिळाली. परंतु येथील स्थानिक लोकप्रतिनिधींनी पाचोरा आणि भडगाव तालुका दुष्काळग्रस्त न करून घेता फक्त दुष्काळ सदृश्‍य घोषित झाला असल्याचे सांगत येथील शेतकऱ्यांच्या तोंडाला फक्त पाने पुसली आहेत.
त्याचा प्रत्यक्षात शेतकऱ्यांना कुठल्याही पद्धतीने फायदा झाला नाही. येथील शेतकरी आजही मदतीच्या आशेवरच आहे. त्यात आता अशा बिकट परिस्थितीत शेतकऱ्यांच्या ऐन खरीप हंगामाच्या लागवडीला सुरुवात झाली असताना शेतकऱ्यांना बियाणे उपलब्ध होत नसल्याचे अमोल शिंदे यांनी सांगितले. त्यामुळे भारतीय जनता पार्टीच्यावतीने यासंदर्भात उपविभागीय अधिकारी पाचोरा व तालुका कृषी अधिकारी पाचोरा यांना निवेदन देऊन याबाबतीत तात्काळ सूचना कराव्यात. शेतकऱ्यांना मुबलक प्रमाणात बियाणे कसे उपलब्ध करून देता येईल अशा उपाययोजना करून तात्काळ बियाणे टंचाई दूर करावी, अन्यथा सत्तेतील पक्षात असताना पाचोरा आणि भडगाव तालुक्यातील शेतकऱ्यांकरिता शेतकऱ्यांसह रस्त्यावर उतरून आंदोलन करू, असे अमोल शिंदे यांनी सांगितले.
याप्रसंगी जिल्हा उपाध्यक्ष प्रदीप पाटील, भडगावचे तालुकाध्यक्ष सोमनाथ पाटील, सरचिटणीस बन्सीलाल पाटील, किसान मोर्चा तालुकाध्यक्ष विजय पाटील, जिल्हा पदाधिकारी अरूण पवार, शहर सरचिटणीस समाधान मुळे, जगदीश पाटील, युवा मोर्चाचे शहराध्यक्ष योगेश ठाकूर, युवा मोर्चाचे चिटणीस अमोल नाथ आदी पदाधिकारी उपस्थित होते.
