साईमत, लोहारा, ता.पाचोरा : वार्ताहर
येथून जवळ असलेल्या शहापुरा येथील जिल्हा परिषदेच्या प्राथमिक शाळेत विद्यार्थ्यांच्या विविध कलागुणांना वाव देण्यासाठी वार्षिक स्नेहसंमेलन मोठ्या उत्साहात साजरा करण्यात आला. कार्यक्रमांमध्ये विद्यार्थ्यांनी विविध कलाकृती सादर केल्या. त्यात ३८ कार्यक्रमाचे सादरीकरण करण्यात आले. त्यात ‘बालविवाह’ नाटिकेत गावात घोड्यावर नवरदेवाची मिरवणूक काढण्यात आली. बालविवाह दाखवून पोलिसांनी कशाप्रकारे नवरदेव, नवरी या सर्वांना अटक केलेले दाखविले. विविध नाटिका, देशभक्तीपर गीते, अंधश्रद्धापर नाटिका, भक्ती गीते अशा विविध प्रकारचे कार्यक्रमाचे आयोजन केले होते. अध्यक्षस्थानी शहापुरा शाळा व्यवस्थापन समितीचे अध्यक्ष दिलीप राजपूत होते. प्रमुख पाहुणे म्हणून म्हसासचे सरपंच तथा शहापुराचे सरपंच योगेश राजपूत, उपसरपंच सुनील राजपूत, ईश्वर परदेशी, विनोद परदेशी, राजूभाऊ परदेशी उपस्थित होते.
कार्यक्रमात सादर केलेल्या विविध नृत्यांना व नाटिकांना उपस्थितांनी पंधरा हजार रुपयाचे बक्षीस देऊन विद्यार्थ्यांचा उत्साह वाढविला. यावेळी कार्यक्रमाला वेगवेगळ्या मान्यवरांनी उपस्थिती दिली. यावेळी म्हसासचे मुख्याध्यापक ज्ञानेश्वर जाधव, कळमसरा शाळेचे मुख्याध्यापक सुभाष पवार, कुंभार खान शाळेचे मुख्याध्यापक किशोर चौधरी, कासमपुरा शाळेचे मुख्याध्यापक डी.आर.पाटील, मनोहर पाटील, दिलीप चव्हाण, श्री.निकम, तुकाराम पाटील, श्री.तपोने, श्री.गायकवाड, किशोर पाटील, श्री.बोरसे, श्री.रोकडे आदी उपस्थित होते.
यावेळी विविध मान्यवरांचा सत्कार शाळा व्यवस्थापन समितीचे अध्यक्ष तथा उपाध्यक्ष, सदस्य, मुख्याध्यापकांच्या हस्ते करण्यात आला. यशस्वीतेसाठी शाळा व्यवस्थापन समितीचे अध्यक्ष व सदस्यांनी गावातील तरुण मित्र मंडळींनी तसेच सरपंच तथा उपसरपंच सर्व ग्रामपंचायत सदस्य, सर्व शहापुरा गावातील नागरिक, पोलीस पाटील, केंद्रातील सर्व शिक्षकांनी मदत केली. सूत्रसंचालन मुख्याध्यापक रत्नाकर पाटील तर आभार शाळेचे उपशिक्षक रवींद्र पाटील यांनी मानले.
