साईमत, कासोदा, ता.एरंडोल : वार्ताहर
येथील सरपंच महेश पांडे यांनी दिलेला शब्द पाळून अडीच वर्षात आपल्या पदाचा राजीनामा दिला. त्यांच्या राजीनाम्यानंतर शुक्रवारी, २० ऑक्टोबर रोजी सरपंच निवडीवेळी सरपंच पदासाठी पुरुषोत्तम उर्फ बंटी चौधरी यांचा एकमेव अर्ज आला होता. त्यामुळे निवडणूक अध्यक्ष अधिकारी शिवाजीराव गुडगुडे, ग्रामपंचायत विस्तार अधिकारी श्री.चव्हाण यांनी बंटी चौधरी यांची बिनविरोध निवड जाहीर केली. यापूर्वी अरशद अली यांचीही उपसरपंचपदी बिनविरोध निवड झाली होती. त्यानंतर सरपंच बंटी चौधरी आणि उपसरपंच अरशद अली यांचे कासोदा ग्रामपंचायतमध्ये जोरदार स्वागत करण्यात आले. याप्रसंगी ग्रा.पं.चे सर्व १७ ग्रामपंचायत सदस्य उपस्थित होते. सरपंच निवडीनंतर ग्रामपंचायतीपासून ते संपूर्ण गावात त्यांची ढोल ताशांच्या गजरात गुलाल उधळत मिरवणूक काढण्यात आली.
सरपंच बंटी चौधरी यांना राजकारणाचा वसा त्यांचे वडील भास्कर चौधरी यांच्याकडून मिळाला आहे. उपसरपंच अरशद अली यांना त्यांचे वडील स्व. मुख्तार अली यांच्याकडून वसा मिळाला आहे. निवडीप्रसंगी जिल्हा बँकेचे उपाध्यक्ष अमोल पाटील, माजी सरपंच महेश पांडे, जिल्हा दूध संघाचे संचालक दगडू चौधरी, भास्कर चौधरी, ग्रामविकास अधिकारी चव्हाण, ग्रामपंचायत सदस्य, पत्रकार बांधव, गावातील प्रतिष्ठित नागरिक बहुसंख्येने उपस्थित होते. याप्रसंगी कासोदा पोलीस स्टेशनकडून चोख पोलीस बंदोबस्त चोख ठेवण्यात आला होता.
