सोलापूर :
मुलाला शिक्षणासाठी मामाकडे पाठविल्याचा राग मनात धरून दारूड्या नवऱ्याने पत्नीचा खून केला आणि तिने स्वतः गळफास घेऊन आत्महत्या केल्याचा बनाव केल्याचा प्रकार करमाळा शहरात घडला. पतीला पोलिसांनी अटक केली आहे. उमा प्रफुल्ल पवार (वय ३२, रा. फंड गल्ली, करमाळा) असे खून झालेल्या महिलेचे नाव आहे.
याप्रकरणी तिचा भाऊ दादा मारुती चव्हाण (वय ३५, रा. लऊळ, ता. माढा) याने करमाळा पोलीस ठाण्यात दिलेल्या फिर्यादीनुसार त्याचा मेव्हणा प्रफुल्ल विठ्ठल पवार (वय ४१) याच्या विरुद्ध गुन्हा दाखल झाला आहे.
नोंद झालेल्या फिर्यादीनुसार आरोपी प्रफुल्ल पवार यास दारूचे व्यसन असून तो कुटुंबाची जबाबदारी सांभाळत नव्हता. त्यामुळे मुलांचे पालनपोषण होणे कठीण झाले होते. त्यामुळे पत्नी उमा हिने तीन वर्षांपूर्वी थोरला मुलगा महेश यास शिक्षणासाठी मोहोळ येथे मामाकडे पाठविले होते. परंतु पती प्रफुल्ल याचा त्यास विरोध होता. याच कारणावरून तो पत्नी उमा हिला त्रास द्यायचा. दारूच्या नशेत तो घरात नेहमीच पत्नीला मारझोड करायचा परंतु मुलाच्या शिक्षणासाठी ती पतीचा त्रास सहन करायची. गेल्या आठवड्यात नागपंचमीसाठी मुलगा महेश करमाळ्यात घरी आला असता प्रफुल्ल याने त्यास आणि पत्नीला जीवे ठार मारण्याची धमकी दिली होती.त्यामुळे घरात धुसफूस सुरूच होती. दरम्यान, प्रफुल्ल याने पत्नी उमा हिच्याशी भांडण काढून तिच्या डोक्यात धारदार हत्याराने प्रहार केल्याने प्रचंड रक्तस्त्राव होऊन ती बेशुद्धावस्थेत निपचित पडली होती.
ही माहिती घराबाहेर मित्रांसह खेळणाऱ्या मुलांना समजताच ती घराकडे धावून आली. तेव्हा आई उमा ही घरातील स्वच्छतागृहाजवळ रक्ताच्या थारोळ्यात बेशुद्ध पडली होती. वडील प्रफुल्ल याने आईने गळफास घेतला आणि खाली पडल्यामुळे मरण पावल्याचे मुलांना सांगितले. दरम्यान, या घटनेची माहिती मिळताच पोलीस घटनास्थळी आले. मृताच्या न्यायवैद्यक तपासणी अहवालानुसार हा आत्महत्येचा नव्हे, तर खुनाचा प्रकार असल्याचे आणि हा खून प्रफुल्ल यानेच केल्याचे निष्पन्न झाले. सहायक पोलीस निरीक्षक एम. एन. जगदाळे हे पुढील तपास करीत आहेत.
