उद्योग क्षेत्रातील कामगारांनाही करोनाची बाधा होत असून, त्यामुळे मृत्यू होण्याचे प्रमाणही वाढले आहे. त्यामुळे भारतीय श्रम मंत्रालयाने भविष्यनिर्वाह निधीद्वारे देण्यात येणाऱ्या विमा योजनेच्या रकमेत एक लाख रुपयांची वाढ केली असून, सभासदाचा मृत्यू झाल्यास कमाल सात लाखांपर्यंत भरपाई मिळणार आहे. पूर्वी ही मर्यादा किमान अडीच लाख ते कमाल सहा लाखांपर्यंत होती.
करोनाचा प्रादुर्भाव वाढल्यानंतर कामगार, कर्मचाऱ्यांनाही त्याची मोठ्या प्रमाणात बाधा झाली आहे. कामगाराचा यामुळे मृत्यू झाल्यास, त्याचे कुटुंबच उघड्यावर येते. कर्मचारी भविष्यनिर्वाह निधी व सुधारणा अधिनियम १९५२ अंतर्गत कर्मचारी भविष्यनिधी सतत विमा योजना १९७६ कार्यान्वित आहे. कामगाराचा मृत्यू झाल्यास या योजनेअंतर्गत सहा लाख रुपयांपर्यंत भरपाई मिळत होती. मात्र, १५ फेब्रुवारीपासून या रकमेत एक लाखाची वाढ करण्यात आली आहे. याबाबतचे नोटिफिकेशन २४ एप्रिल रोजी काढण्यात आले आहे. कर्मचाऱ्याच्या पगारातून १२ टक्के रक्कम पीएफ म्हणून कापली जाते व तेवढीच मालकाला भरावी लागते. या व्यतिरिक्त अर्धा टक्का रक्कम विम्याची वर्गणी भरावी लागते. ही विमा रक्कम सरकारने आता किमान अडीच लाख ते कमाल सात लाखांपर्यंत वाढवली आहे. कर्मचारी डिपॉझिट लिंक इन्शुअरन्स योजनेंतर्गत हा विमा प्रत्येक पीएफ सभासदास आपोआप लागू असतो. या योजनेअंतर्गत नाशिक कार्यालयाने नाशिक, धुळे, जळगाव, नंदुरबार, अहमदनगर या पाच जिल्ह्यांतील ४७६ सभासदांच्या वारसांना एक कोटी ५९ लाख ९४ हजार रुपयांचे दावे निकाली काढले आहेत. एखाद्या कर्मचाऱ्याच्या नोकरीच्या कालावधीवर ही रक्कम अवलंबून असते. या विम्याच्या अंतर्गत प्राप्त रक्कम गेल्या बारा महिन्यांत प्राप्त झालेल्या मासिक पगाराच्या तीस पट असते; पण ती सात लाखांपेक्षा जास्त असू शकत नाही.
एकशे पाच कोटींचे पीएफ दावे निकाली
भविष्यनिर्वाह निधी विभागातर्फे एकूण दोन लाख ५० हजार २७६ सभासदांना १०५ कोटी ५३ लाख रुपये अदा करण्यात आले आहेत. त्यात १ कोटी ६० लाखांची विमा रक्कम देण्यात आली आहे. ४७,७२२ सभासदांनी ३५ कोटी चार लाख रुपयांचा पीएफ काढून घेतला आहे. पीएफ खात्यातून उचल घेणाऱ्या एक लाख ३२ हजार ५७५ सभासदांद्वारे ४० कोटी २६ लाख रुपये विविध कारणांसाठी काढण्यात आले आहेत. पेन्शन दाव्यासाठीच्या ५,८९६ सभासदांनी २२ कोटी ९८ लाख रुपये काढले, तर पेन्शन योजनच्या १०-क साठी ३४,५०७ सभासदांनी पाच कोटी ६७ लाख रुपये काढले.
भविष्यनिर्वाह निधी सभासद व त्यांच्या कुटुंबीयांना या महामारीच्या काळात भविष्य निधी योजना, पेन्शन व भविष्य निधी संलग्न विमा योजनेची माहिती मिळणे आवश्यक आहे. त्यांनी या योजनांचा लाभ घ्यावा.
